ឯកឧត្តម Vladimir Goshin ឯកអគ្គរដ្ឋទូតប៉េឡារ៉ុស ប្រចាំកម្ពុជា ដែលមាននិវេសនដ្ឋាន នៅវៀតណាម បានមានប្រសាសន៍ថា ប៉េឡារ៉ុសកំពុងពិនិត្យលទ្ធភាពស្វែងរកឱកាស​បង្កើននូវការវិនិយោគ នៅប្រទេសកម្ពុជា ។

ក្នុងជំនួបពិភាក្សាការងារជាមួយ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នារសៀលថ្ងៃទី១១ ខែកុម្ភៈ ឆ្នាំ២០២០ ឯកឧត្តម Vladimir Goshin ចាត់ទុកកម្ពុជាជាប្រទេសដ៍មានសារៈសំខាន់នៅក្នុងសមាគមប្រជាជាតិ អាស៊ី-អាគ្នេយ៍
ទាំងលើទំនាក់ទំនងនយោបាយ សេដ្ឋកិច្ច។ លើសពីនេះឯកឧត្តមយល់ឃើញថា ប៉េឡារ៉ុស-កម្ពុជា ត្រូវបន្ដពង្រីក និងពង្រឹងបន្ថែមទៀត នូវកិច្ចសហប្រតិបត្តិការរវាងប្រទេសទាំងពីរទៅលើគ្រប់វិស័យជាពិសេស វិស័យសេដ្ឋកិច្ច។

សម្ដេចក្រឡាហោម ស ខេង បានថ្លែងអំណរគុណ និងគាំទ្រចំពោះ ប៉េឡារ៉ុស ដែលមានបំណងស្វែងរកការវិនិយោគនៅប្រទេសកម្ពុជា និងបានចាត់ទុក ប៉េឡារ៉ុស ជាមិត្តចាស់របស់កម្ពុជាក្នុងការបន្ដពង្រឹងពង្រីកទំនាក់ទំនង និងកិច្ចសហប្រតិបត្តិការកាន់តែខ្លាំងក្លាថែមទៀត។

ដោយឡែក សម្ដេចក្រឡាហោម ក៏បានស្នើឲ្យ ប៉េឡារ៉ុស ពិនិត្យលទ្ធភាពបង្កើននូវកិច្ចសហប្រតិបត្តិការ រវាងក្រសួងមហាផ្ទៃ ជាមួយស្ថាប័នពាក់ព័ន្ធរបស់ប៉េឡារ៉ុស នៅលើវិស័យនគរបាលជាតិផងដែរ។
ជាការឆ្លើយតប ឯកឧត្តម Vladimir Goshin ឯកភាពចំពោះការលើកឡើងរបស់សម្ដេច ក្នុងការបង្កើតឲ្យមានកិច្ចសហប្រតិបត្តិការរវាង ក្រសួងមហាផ្ទៃ ជាមួយនឹងក្រសួងកិច្ចការផ្ទៃក្នុងរបស់ប៉េឡារ៉ុស ដែលតាមរយៈការបង្កើនទំនាក់ទំនង កិច្ចសហប្រតិបត្តិការនេះ ភាគីទាំងពីរអាចពិនិត្យមើលលើកិច្ចការពាក់ព័ន្ធនានា ដូចជា ការងារប្រយុទ្ធប្រឆាំងនៅឧក្រិដ្ឋកម្មឆ្លងដែន និងបទល្មើសផ្សេងៗ៕

ដោយ៖ នាយកដ្ឋានព័ត៌មានវិទ្យា