នៅព្រឹកថ្ងៃទី០៩ ខែកុម្ភៈ ឆ្នាំ២០២០ នាស្ដីការក្រសួងមហាផ្ទៃ គណៈកម្មាធិការប្រយុទ្ធប្រឆាំង ផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក) រៀបចំពិធី ចុះហត្ថលេខាលើអនុស្សារណៈ នៃការយោគយល់គ្នា (MOU) ជាមួយ សមាគមសហព័ន្ធវិនិយោគិនកម្ពុជា (សមាគមអ្នកលក់ ឱសថកម្ពុជា)។
នៅក្នុងពិធីចុះ MOU រវាងភាគីទាំងពីរនេះ គឺមានការចូលរួមពី ថ្នាក់ដឹកនាំតំណាងក្រសួង ស្ថាប័នពាក់ព័ន្ធ អង្គទូតនានាប្រចាំនៅកម្ពុជា អង្គការដៃគូ កងកម្លាំងប្រដាប់អាវុធ មន្ត្រីរាជការ ក្រុមហ៊ុនឯកជន និងសមាជិកាសមាគម សរុបប្រមាណ ៥០០នាក់។
សូមជម្រាបថា ពិធីចុះ MOU នាពេលនេះ គឺស្តីអំពីកិច្ចសហប្រតិបត្តិការ ដើម្បីប្រយុទ្ធប្រឆាំងការនាំចូល ការផលិត និងការចែកចាយនូវផលិតផល ឱសថ គ្រឿងសម្អាង ដែលក្លែងក្លាយ នាំចូលគ្មានការអនុញ្ញាត រំលោភកម្មសិទ្ធិបញ្ញា និងរំលោភសិទ្ធិនាំចូលផ្តាច់មុខ នៅក្នុងព្រះរាជាណាចក្រកម្ពុជា៕
ដោយ៖ នាយកដ្ឋានព័ត៌មានវិទ្យា