ក្រោយជំនួបរវាងសម្តេចក្រឡាហោម ស ខេង នាយករដ្ឋមន្រ្តីស្តីទី និងតំណាងប្រទេសដែលបានបញ្ជូនពលករចំណាកស្រុក នារសៀលថ្ងៃទី៥ ខែកុម្ភៈ ឆ្នាំ២០២០ នាទីស្តីការក្រសួងមហាផ្ទៃ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងការជួញដូរមនុស្ស(គ.ជ.ប.ជ) មានប្រសាសន៍ថា គណៈកម្មាធិការជាតិប្រយុទ្ធប្រឆាំងការជួញដូរមនុស្ស នឹងបន្តពង្រឹងជំហរក្នុងការទប់ស្កាត់ការជួញដូរមនុស្សជាមួយភាគីពាក់ព័ន្ធក្នុងតំបន់អាស៊ានដែលក្នុងនោះរួមមាន ៣ប្រទេសផ្សេងទៀតដូចជា វៀតណាម ឡាវ និងមីយ៉ាន់ម៉ា តាមរយៈការរួមគ្នាផ្លាស់ប្តូរយោបល់ដើម្បីរកដំណោះស្រាយ សម្រាប់ពលករដែលជួបនឹងបញ្ហាការជួញដូរមនុស្ស ទៅកាន់ប្រទេសផ្សេងទៀត ដែលករណីនេះនៅតែបន្តកើតមាននៅឡើយ។
ប្រសាសន៍លោកជំទាវ«ពួកយើងបានជួបពិភាក្សាគ្នាអំពីពលករដែលបានបញ្ជូន ទៅក្រៅប្រទេស ហើយនាំគ្នាដោះស្រាយរួម និងផ្លាស់ប្តូរយោបល់គ្នាទៅវិញទៅមក ដើម្បីកាត់បន្ថយភាពរងគ្រោះរបស់ពលករដែលបានទៅធ្វើការងារនៅក្រៅប្រទេស»។
សូមបញ្ជាក់ថា កម្ពុជា វៀតណាម ឡាវ មីយ៉ាន់ម៉ា ព្រមទាំងអង្គការអន្តរជាតិទេសន្តប្រវេសន៍ (IOM) បានបើកសិក្ខាសាលាសម្របសម្រួលថ្នាក់តំបន់ ស្តីពីការធ្វើចំណាកស្រុកដោយសុវត្ថិភាព ដែលបានបញ្ជូនពលករចំណាកស្រុកគេ ។ សិក្ខាសាលានេះធ្វើ ដើម្បីបន្តស្វែងរកដំណោះស្រាយបន្ថែម ចំពោះប្រជាជនរបស់ខ្លួន ដែលបានបញ្ជូននិងលួចទៅធ្វើការនៅក្រៅប្រទេស។ សិក្ខាសាលានេះ ធ្វើឡើង២ថ្ងៃចាប់ពីថ្ងៃទី៤-៥ កុម្ភៈ ដោយកម្ពុជាធ្វើជាម្ចាស់ផ្ទះ៕
ដោយ៖ នាយកដ្ឋានព័ត៌មានវិទ្យា
