ព្រឹកថ្ងៃអង្គារ ទី៤ ខែកុម្ភៈ ឆ្នាំ២០២០ ឯកឧត្តម អ៉ីវ លាង អគ្គាធិការ នៃអគ្គាធិការដ្ឋាន បើកកិច្ចប្រជុំពិភាក្សារបាយការណ៍ស្តីពីលទ្ធផល នៃការចុះអង្កេតស្រាវជ្រាវ ករណីបណ្តឹងរបស់ប្រជាពលរដ្ឋ១គ្រួសារ នៃជនរងគ្រោះ គោរពជូន សម្តេចក្រឡាហោម មេត្តាជួយរកយុត្តិធម៌ ដោយចោទប្រកាន់ថា លោកអធិការ និងមន្ត្រីនគរបាល នៃអធិការដ្ឋាននគរបាលស្រុក១ នៅខេត្តបាត់ដំបង ពេលចុះប្រតិបត្តិការបានធ្វើទារុណកម្មជនរងគ្រោះរហូតដល់បាត់បង់ជីវិត ដែលហេតុការណ៌នេះកើតឡើងពីការចុះប្រតិបត្តិបង្ក្រាបល្បែងអាប៉ោងមួយកន្លែង នៅវេលាម៉ោងជាង៩យប់ តាមបទបញ្ជារបស់លោកអធិការ ដោយលោកអធិការរូបនោះពុំបានសុំការអនុញ្ញាតជាគោលការណ៍តាមនីតិវិធី ដើម្បីចុះប្រតិបត្តិការនោះទេ៕
ប្រភព៖ អគ្គាធិការដ្ឋាន
កិច្ចប្រជុំនេះប្រព្រឹត្តទៅ នៅសាលប្រជុំរបស់អគ្គាធិការដ្ឋាន និង មានការអញ្ជើញចូលរួមពី ឯកឧត្តម លោកជំទាវ អគ្គាធិការរង ប្រធាននាយកដ្ឋាន អនុប្រធាននាយកដ្ឋាន និងមន្ត្រីជំនាញ ៕
