ក្នុងពិធីបើកវេទិកាលើកទី៤ ស្ដីពីភាពជាដៃគូរវាងរាជរដ្ឋាភិបាល និងអង្គការសង្គមស៊ីវីល នៅថ្ងៃទី៣ ខែកុម្ភះ ឆ្នាំ២០២០នាទីស្តីការក្រសួងមហាផ្ទៃ សម្តេចក្រឡាហោម ស ខេង នាយករដ្ឋមន្រ្តីស្តីទី បានលើកឡើងថា ទាំងសមាគម និងអង្គការសង្គមស៊ីវិល ទាំងអាជ្ញាធរថ្នាក់ក្រោមជាតិទាំងអស់ត្រូវសហការធ្វើការរួមគ្នាផ្តល់ព័ត៌មានជាក់លាក់ និងរួមគ្នាដោះស្រាយនូវបញ្ហាប្រឈមទាំងនោះ ដើម្បីធ្វើយ៉ាងណាពង្រឹងភាពជាដៃគូរវាងរាជរដ្ឋាភិបាល និងអង្គការសង្គមស៊ីវិលអោយកាន់តែមានប្រសិទ្ធក្នុងគោលដៅរួមគ្នាសម្រាប់អភិវឌ្ឍន៍ប្រទេសកម្ពុជា។ សម្តេចបន្តថា ជាក់ស្តែងនាពេលកន្លងមកបញ្ហាប្រឈមមួយចំនួនដែលអង្គការសង្គមស៊ីវិលបានផ្តល់មកឱ្យមន្រ្តីរាជរដ្ឋាភិបាលនូវមានភាពមិនគ្រប់ជ្រុងជ្រោយ ហើយបែរជាយកករណីទាំងនោះទៅផ្សព្វផ្សាយថាភាគីរដ្ឋាភិបាលមិនបានយកចិត្តទុកដាក់ដោះស្រាយទៅវិញ។
ប្រសាសន៍សម្តេច៖ ខ្ញុំសូមបញ្ជាក់អំពីព័ត៌មានអំពីទំនាក់ទំនងមិនបានល្អរវាងរដ្ឋបាលមូលដ្ឋានឬអាជ្ញាធរថ្នាក់ក្រោមជាតិ និងអង្គការសង្គមស៊ីវិល យើងបានទទួលព័ត៌មានពីរករណី ប៉ុន្តែកន្លងអង្គការសង្គមស៊ីវិលខ្លះក៏បានលើកឡើងមិនមែនពីរទេគឺ ច្រើនករណីរហូតដល់រយករណី ចំនុចនេះយើងខ្ញុំមិនបដិសេធទេ ប៉ុន្តែយើងខ្ញុំមានចម្ងល់ថា ហេតុបើសិនជាមានករណី បែបនេះហើយគាត់ (អង្គការសង្គមស៊ីវិល) បូកសរុបយកទៅផ្សព្វផ្សាយ តែគាត់ (អង្គការសង្គមស៊ីវិល) មិនបានផ្តល់ព័ត៌មាននេះមក អោយសមត្ថកិច្ចរបស់រាជរដ្ឋាភិបាល ចឹងប្រៀបដូចគាត់ (អង្គការសង្គមស៊ីវិល) លាក់ព័ត៌មាន ចឹងទំនាក់ទំនងរបស់យើងវាមិន តម្លាភាព វាមិនមែនការកសាងភាពជាដៃគូ ជាការមើលបំណាំ ចឹងយើងខ្ញុំស្វាគមន៍ពីព្រោះថាយើងមានយន្តការអចិន្ត្រៃយ៍ផង ដើម្បីនឹងដោះស្រាយបញ្ហានានា ហើយក៏យើងមានយន្តការវេទិការសាធារណៈនៅថ្នាក់ជាតិនេះផង និងថ្នាក់ក្រោមជាតិផង ចឹងបើពួកគាត់ (អង្គការសង្គមស៊ីវិល) លាក់ព័ត៌មាន យើងក៏មិនដឹងដោះស្រាយបញ្ហាយ៉ាងម៉េចដែរ តែបើគាត់ (អង្គការសង្គមស៊ីវិល) លាតត្រដាង ព័ត៌មានដោយចំហរដោយតម្លាភាព ហើយសមត្ថកិច្ចមិចដោះស្រាយនោះជាកំហុសរបស់មន្រ្តីរដ្ឋាភិបាល តែបើគាត់ (អង្គការសង្គមស៊ីវិល) លាក់ព័ត៌មានហើយយកទៅផ្សព្វផ្សាយទាំងព័ត៌មានពិត និងព័ត៌មានមិនពិត អាណឹងអាចចាត់ទុកថាជាចន្លោះ ប្រហោង ឬក៏ស្មារតីសហការ ការកសាងភាពជាដៃគូរបស់អង្គការសង្គមស៊ីវិល ជាមួយរដ្ឋាភិបាលមិនល្អ៕ គឹមអាន
ដោយ៖ នាយកដ្ឋានព័ត៌មានវិទ្យា