សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានថ្លែងថា មកដល់បច្ចុប្បន្ននេះ សភាពការណ៍ពិភពលោក បានបង្ហាញថា គ្មានប្រទេសណាមួយអាចស្ថិតនៅតែឯង គ្មានទំនាក់ទំនងជាមួយបរទេស គ្មានជនបរទេសចេញ-ចូលឆ្លងកាត់ និងស្នាក់អាស្រ័យនៅនោះទេ។
ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៩ និងលេីកទិសដៅការងារឆ្នាំ២០២០ របស់អគ្គនាយកដ្ឋានអន្ដោប្រវេសន៍នៅរសៀលថ្ងៃទី៣០ ខែមករា ឆ្នាំ២០២០ សម្ដេចក្រឡាហោម ស ខេង មានប្រសាសន៍ថា "រហូតមកដល់បច្ចុប្បន្ននេះ សភាពការណ៍ពិភពលោកបានបង្ហាញថាគ្មានប្រទេសណាមួយ អាចស្ថិតនៅតែឯងគ្មានទំនាក់ទំនងការបរទេស គ្មានជនបរទេសចេញ-ចូលឆ្លងកាត់ និងស្នាក់អាស្រ័យនៅនោះទេ"។
សម្ដេចក្រឡាហោមបន្ថែមថា តាមស្ថិតិដែលបានស្រាវជ្រាវ ដកចេញពីរបាយការណ៍របស់អង្គការអន្តរជាតិធំៗ ទទួលបន្ទុកតាមវិស័យ នីមួយៗ បង្ហាញថា នៅក្នុងឆ្នាំ២០១៩ កន្លងទៅចំនួនទេសចរណ៍ពិភពលោកសរុបមានជាង ១.៤០០ លាននាក់ កើន ៥% ក្នុងនោះទ្វីបអាស៊ីមាន ៣៤៨ លាននាក់ ចំនួនទេសន្តរប្រវេសន្តមាន ២៧២លាននាក់ កើន ២.៥% ដោយសារមូលហេតុគេចពីសង្គ្រាម ជំលោះការធ្វើទុក្ខបុកម្និញ ភាពវេទនា ការស្វែងរកលក្ខខណ្ឌ ជីវភាពប្រសើរជាង ការជួបជុំគ្រួសារ កត្តាធម្មជាតិ និងបរិស្ថាន ។
សម្ដេចក្រឡាហោមបញ្ជាក់ថា ចំនួនជនភៀសខ្លួនមាន ៧០,៨ លាននាក់ និងជនរងគ្រោះដោយសារអំពើជួញដូរមនុស្សឆ្លងដែន មានរហូត ២៤,៩ លាននាក់ ដែលក្នុងនោះមាន ៦៤% ត្រូវបានគេបង្ខំឱ្យធ្វើការ ១៩% ត្រូវបង្ខំឱ្យធ្វើពេស្យាចារ ១៧% ត្រូវបង្ខំឱ្យធ្វើការធ្ងន់ធ្ងរ កត់សម្គាល់ក្នុងនោះមាន ៧១% ជនរងគ្រោះ គឺជាស្ត្រី និងកុមារ ។
ជាងនេះទៅសម្តេចក្រឡហោមបានអះអាងថា ចំពោះព្រះរាជាណាចក្រកម្ពុជា ពិតជាត្រូវការវត្តមានជនបរទេស និងចង់បានឱ្យចំនួន អ្នកទេសចរណ៍ ពាណិជ្ជករ អ្នកវិនិយោគ និងអ្នកឯកទេសពិតប្រាកដមានការកើនឡើងខ្ពស់ ដែលអាចជួយដល់ការអភិវឌ្ឍសេដ្ឋកិច្ចជាតិ និងការធ្វើឱ្យប្រសើរឡើងនូវជីវភាពរស់នៅរបស់ប្រជាពលរដ្ឋ៕
ដោយ៖ នាយកដ្ឋានព័ត៌មានវិទ្យា