សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានមានប្រសាសន៍ថា រាជរដ្ឋាភិបាលកម្ពុជា មានជំនឿយ៉ាងមុតមាំថា សមាគមជាតិក្រុមប្រឹក្សារដ្ឋបាលថ្នាក់ក្រោមជាតិទាំងអស់នឹងបន្តក្លាយជាដៃគូដ៏សំខាន់ ក្នុងការចូលរួមចំណែកក្នុងកិច្ចដំណើរការរៀបចំ និងអនុវត្តគោលនយោបាយរបស់រាជរដ្ឋាភិបាល ជាពិសេសក្នុងការរៀបចំ និងអនុវត្តកម្មវិធីកំណែទម្រង់វិមជ្ឈការ និងវិសហមជ្ឈការប្រកបដោយប្រសិទ្ធភាព ដែលកំពុងមានការវិវឌ្ឍឈានចូលទៅដំណាក់កាលកាន់តែស៊ីជម្រៅពាក់ព័ន្ធនឹងការផ្ទេរមុខងារ ធនធាន និងការទទួលខុសត្រូវកាន់តែច្រើនឡើងៗទៅឱ្យរដ្ឋបាលថ្នាក់ក្រោមជាតិ រួមនឹងការពង្រឹងសមត្ថភាព និងភាពជាអ្នកដឹកនាំរបស់រដ្ឋបាលថ្នាក់ក្រោមជាតិក្នុងការគ្រប់គ្រង ការចាត់ចែង និងការអនុវត្តមុខងារ និងធនធានដែលបានផ្ទេរឱ្យទាំងនោះ។ សម្តេចក្រឡាហោម បានមានប្រសាសន៍បែបនេះ ក្នុងឱកាសអញ្ជើញជាអធិបតីបិទមហាសន្និបាត លើកទី៣ អាណត្តិទី៣ នៃសម្ព័ន្ធភាពជាតិសមាគមក្រុមប្រឹក្សាក្រុង ស្រុក ខណ្ឌ ឃុំ សង្កាត់ នាព្រឹកទី២៧ ខែធ្នូ ឆ្នាំ២០១៩ នៅសណ្ឋាគារភ្នំពេញ។
សម្តេចក្រឡាហោម បន្តថា សមាគមក្រុមប្រឹក្សាថ្នាក់ក្រោមជាតិមានតួនាទី ភារកិច្ចសំខាន់ៗ រួមមាន៖ ទី១. ជាមជ្ឈមណ្ឌលចងក្រងឯកសារ និងប្រមូលផ្ដុំព័ត៌មានអំពីក្រុមប្រឹក្សានៅថ្នាក់ក្រោមជាតិ, ទី២. ជាវេទិកាសម្រាប់ផ្សព្វផ្សាយ និងចែករំលែកព័ត៌មាន គោលនយោបាយ ច្បាប់ លិខិតបទដ្ឋាន និងគោលការណ៍ណែនាំផ្សេងៗរបស់រដ្ឋាភិបាលនៅថ្នាក់ជាតិដល់ក្រុមប្រឹក្សាថ្នាក់ក្រោមជាតិដែលជាសមាជិករបស់សមាគម, ទី៣. ជាយានសម្រាប់ពាំនាំបញ្ហាប្រឈមនានារបស់ក្រុមក្សាថ្នាក់ក្រោមជាតិ ដើម្បីជម្រាបជូនរដ្ឋាភិបាលជាតិក្នុងបំណងស្វែងរកដំណោះស្រាយ, ទី៤. ជាសម្លេងរបស់ក្រុមប្រឹក្សាថ្នាក់ក្រោមជាតិក្នុងការស្វែងរកការគាំទ្រ និងការការពារផលប្រយោជន៍រួមរបស់ក្រុមប្រឹក្សាថ្នាក់ក្រោមជាតិ,ទី៥. ជាអ្នកផ្តល់សេវាពិគ្រោះយោបល់ និងការកសាងសមត្ថភាពដល់សមាជិករបស់ខ្លួនជាក្រុមប្រឹក្សាថ្នាក់ក្រោមជាតិ និងទី៦. ជាយន្តការសម្រាប់ឲ្យក្រុមប្រឹក្សាថ្នាក់ក្រោមជាតិ ចែករំលែកចំណេះដឹង មេរៀន និងបទពិសោធន៍ល្អៗ ទាក់ទងនឹងការងារអភិបាលកិច្ច ការងារអភិវឌ្ឍន៍មូលដ្ឋាន និងការផ្តល់សេវាជូនប្រជាពលរដ្ឋ ប្រកបដោយប្រសិទ្ធភាព តម្លាភាព និងគណនេយ្យភាព។
សូមបញ្ជាក់ដែរថា បច្ចុប្បន្ន ប្រទេសកម្ពុជា មានសមាគមក្រុមប្រឹក្សារដ្ឋបាលថ្នាក់ក្រោមជាតិ ដែលបានចុះបញ្ជីផ្លូវការចំនួន ៣ ប្រភេទគឺ ១). សម្ព័ន្ធភាពជាតិសមាគមក្រុមប្រឹក្សា ក្រុង ស្រុក ឃុំ សង្កាត់ឬហៅថា សម្ព័ន្ធភាពជាតិក្រមប្រឹក្សាថ្នាក់មូលដ្ឋាន, ២). សមាគមក្រុមប្រឹក្សាថ្នាក់មូលដ្ឋានថ្នាក់រាជធានី ខេត្ត និង, ៣). សមាគមជាតិក្រុមប្រឹក្សារាជធានី ខេត្ត ឬហៅថា សមាគមក្រុមប្រឹក្សាថ្នាក់តំបន់៕ គឹមអាន
ដោយ៖ នាយកដ្ឋានព័ត៌មានវិទ្យា
