ព្រឹកថ្ងៃសុក្រ ទី២៧ ខែធ្នូ ឆ្នាំ២០១៩ ឯកឧត្តម អ៉ីវ លាង អនុប្រធានក្រុមការងារថ្នាក់ជាតិចុះជួយស្រុកបាភ្នំ និងជាប្រធានក្រុមការងារថ្នាក់ជាតិចុះជួយឃុំបឹងព្រះ បានអញ្ជើញជាអធិបតី ក្នុងកិច្ចប្រជុំបូកសរុបសកម្មភាពការងារប្រចាំឆ្នាំ២០១៩ និងទិសដៅសកម្មភាពអនុវត្តបន្តសម្រាប់ឆ្នាំ២០២០ របស់ក្រុមការងារថ្នាក់ជាតិចុះជួយឃុំបឹងព្រះ ស្រុកបាភ្នំ ខេត្តព្រៃវែង ។
បន្ទាប់ពីស្តាប់របាយការណ៍សង្ខេបប្រចាំឆ្នាំរបស់ឃុំរួចមក ឯកឧត្តមបានវាយតម្លៃខ្ពស់ពីសកម្មភាពការងារសម្រាប់ឆ្នាំ២០១៩ ដែលទទួលបានលទ្ធផលគួរជាទីមោនៈ ទាំងនេះកើតចេញពីការខិតខំប្រឹងប្រែងរបស់ក្រុមការងារថ្នាក់ជាតិ ជាពិសេសក្រុមការងារនៅមូលដ្ឋានដែលនៅកៀកផ្ទាល់ជាមួយបងប្អូនប្រជាពលរដ្ឋ ដោយចំណាយពេលវេលា កំលាំងកាយចិត្ត និងថវិកាដើម្បីបំពេញនូវសំណូមពរ ដោះស្រាយបញ្ហាប្រឈមនានារបស់បងប្អូនប្រជាពលរដ្ឋកន្លងមក ដែលបានរំលេចក្នុងរបាយការណ៍នេះស្រាប់ ។
ទន្ទឹមពេលនោះ ឯកឧត្តម បានស្នើក្រុមការងារទាំងអស់បន្តខិតខំប្រឹងប្រែងបន្ថែមទៀត ដើម្បីជំរុញសកម្មភាពការងារសម្រាប់ឆ្នាំ២០២០ ឱ្យកាន់តែល្អប្រសើរថែមទៀត បន្ទាប់មក ឯកឧត្តម បានផ្តល់អនុសាសន៍មួយចំនួនសំរាប់ទិសដៅបន្តសម្រាប់ឆ្នាំ២០២០ ផងដែរ។
នាឱកាសនោះមានការអញ្ជើញចូលរួមពី ក្រុមការងារថា្នក់ជាតិចុះជួយឃុំ ក្រុមប្រឹក្សាឃុំ និងអ្នកពាក់ព័ន្ធ សរុបប្រមាណ៥៥នាក់។
ប្រភព៖ អគ្កាធិការដ្ឋាន