នារសៀលថ្ងៃពុធ ទី២៥ ខែធ្នូ ឆ្នាំ២០១៩ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអនុញ្ញាតឱ្យក្រុមនិស្សិតជ័យលាភីអាហារូបករណ៍រដ្ឋាភិបាលណូវែលហ្សេឡង់ ឆ្នាំ២០២០ ចំនួន១៦រូប ចូលជួបសម្តែងការគួរសម នាទីស្តីការក្រសួងមហាផ្ទៃ។
ថ្លែងក្នុងឱកាសនោះ សម្តេចក្រឡាហោម បានមានប្រសាសន៍ចូលរួមត្រេកអរជាមួយក្មួយៗនិស្សិតទាំងអស់ និងបានរំលឹកដល់អោយខិតខំប្រឹងប្រែងសិក្សារៀនសូត្រក្នុងរយៈពេលដល់មានតំលៃនេះ។ សម្តេចក្រឡាហោម ក៏បានរំលឹកផងដែរថា ចាប់តាំងពីឆ្នាំ១៩៧៩កន្លងមក ប្រទេសកម្ពុជាបានបញ្ជូននិស្សិតទៅសិក្សានៅប្រទេសមួយចំនួន ដែលជាប្រទេសចូលរួមជួយគាំទ្រលើវិស័យអប់រំដល់ប្រទេសកម្ពុជា ហើយភាគច្រើនទទួលបានជោគជ័យ និងចូលបម្រើការងារតាមជំនាញរៀងៗខ្លួនរហូតមកដល់បច្ចុប្បន្ន។
ជាងនេះទៀត សម្តេចក្រឡាហោម បានមានប្រសាសន៍បន្តថា រាជរដ្ឋាភិបាលកំពុងយកចិត្តទុកដាក់លើកទឹកចិត្ត និងជម្រុញឱ្យមានការបន្តការសិក្សារបស់និស្សិតកម្ពុជានៅបណ្តាប្រទេសនានា ដើម្បីដកស្រង់បទពិសោធន៍នានាពីប្រទេសទាំងនោះយកមកចូលរួមអភិវឌ្ឍន៍ប្រទេសវិញ។ សម្តេចក្រឡាហោម បានផ្តល់ការណែនាំដល់ក្រុមនិស្សិតទាំងអស់ ឱ្យខិតខំយកចិត្តទុកដាក់សិក្សារៀនសូត្រ និងនាំយកចំណេះដឹងថ្មីៗបន្ថែមទៀត សម្រាប់យកមកអភិវឌ្ឍប្រទេសជាតិ ក្រោយទទួលបានជោគជ័យពីការសិក្សារបស់ខ្លួន និងដើម្បីបង្ហាញស្នាដៃរបស់ខ្លួនក្នុងសង្គមជាតិផងដែរ។ ហើយ សម្តេច ក៏បានផ្តាំផ្ញើឱ្យយកចិត្តទុកដាក់ថែរក្សាសុខភាពឱ្យល្អប្រសើរ ក្នុងការរស់នៅ និងការសិក្សារៀនសូត្រនៅប្រទេសវែលហ្សេឡង់ ហើយក្នុងឱកាសនោះ សម្តេចក៏បានផ្តល់នូវថវិកាឧបត្ថម្ភដល់ក្រុមនិស្សិតជ័យលាភីទាំងអស់នូវទឹកប្រាក់ចំនួន ៤.៨០០ដុល្លារផងដែរ៕ រតនា
ដោយ៖ នាយកដ្ឋានព័ត៌មានវិទ្យា
