ព្រឹកថ្ងៃសុក្រ ទី១៣ ខែធ្នូ ឆ្នាំ២០១៩ ឯកឧត្តម អ៉ីវ លាង អនុប្រធានក្រុមការងារថ្នាក់ជាតិចុះជួយស្រុកបាភ្នំ និងជាអគ្គាធិការ នៃអគ្គាធិការដ្ឋានក្រសួងមហាផ្ទៃ អញ្ជើញជួបសំណេះសំណាលជាមួយបងប្អូនប្រជាពលរដ្ឋ ស្ថិតនៅក្នុង ភូមិឬស្សីជួរ ឃុំបឹងព្រះ ស្រុកបាភ្នំ ខេត្តព្រៃវែង។
បន្ទាប់ពីស្តាប់សេចក្តីរាយការណ៍សង្ខេបរួចមក ឯកឧត្តមបានថ្លែងអំណរអរគុណចំពោះបងប្អូនដែលផ្តល់យុត្តិធម៌ដល់រាជរដ្ឋាភិបាលដោយមិនគាំទ្រនយោបាយបោកប្រាស់របស់សម រង្ស៉ី ជាពិសេសថ្ងៃ៩ខែវិច្ឆិកា សូមបងប្អូនរួមគ្នារក្សាសន្តិភាពរបស់យើងទាំងអស់គ្នា ហើយបន្តខិតខំបង្កបង្កើនផល រកស៊ីរៀងខ្លួន សូមឈប់ជឿនយោបាយប្រជាភិថុតរបស់ទណ្ឌិត សម រង្សីទៀត ដោយបន្តគាំទ្រសម្តេចតេជោ គណបក្សប្រជាជនដើម្បីរក្សាសន្តិភាព និងការអភិវឌ្ឍប្រទេសបន្តទៅទៀត ។ ឯកឧត្តមបន្តទៀតថា ស្នើសុំបងប្អូនមេត្តាកុំខឹងអាជ្ញាធរ ព្រោះការអភិវឌ្ឍន៍ប្រព្រឹត្តទៅជាជំហានៗ ដោយកញ្ចប់ថវិកាមានកំណត់ សូមចូលរួមអភិវឌ្ឍទាំងអស់គ្នា ដោយឡែកចំពោះបញ្ហាសង្គមកិច្ចនៅតែបន្ត។
នាឱកាសនោះ បងប្អូនបានលើកឡើងនូវបញ្ហាប្រឈម ក្តីកង្វល់ សំណូមពរមានបញ្ហាជួសជុលផ្លូវបំពេញក្រហុក ខ្សាច់ចាក់ផ្លូវ បញ្ហាគីឡូភ្លើងឡើង ហើយឯកឧត្តមបានទទួលយក និងដោះស្រាយសំណូមពរទាំងអស់ផងដែរ។ វេទិកានេះមានការអញ្ជើញចូលរួមពី ក្រុមការងារចុះជួយភូមិ អភិបាលរងស្រុក លោកមេឃុំ ក្រុមប្រឹក្សាឃុំ ប្រធានមណ្ឌល សុខភាព មេភូមិ និងអាជ្ញាធរពាក់ព័ន្ធ។
សូមជម្រាបថា គោលបំណងក្នុងការរៀបចំវេទិការសាធារណៈនេះ គឺជាការផ្សារភ្ជាប់ទំនាក់ទំនងរវាងក្រុមការងារថ្នាក់ជាតិ ជាមួយបងប្អូនប្រជាពលរដ្ឋនៅមូលដ្ឋាន ដើម្បីស្តាប់ក្តីកង្វល់ ទទួលសំណូមពរនានា និងជាឱកាសសម្រាប់បងប្អូនប្រជាពលរដ្ឋបញ្ចេញមតិរបស់ខ្លួនដោយសេរី ព្រមទាំងអាចលើកឡើងនូវបញ្ហាប្រឈមទាក់ទងនឹងស្ថានភាពជីវភាពរស់នៅ សន្តិសុខ សុវត្ថិភាព ដែលកំពុងកើតមានឡើងក្នុងមូលដ្ឋានរបស់ខ្លួន ដើម្បីចូលរួមគ្នារកដំណោះស្រាយ៕
ប្រភព៖ អគ្គាធិការដ្ឋាន