នារសៀលថ្ងៃព្រហស្បតិ៍ ទី១២ ខែធ្នូ ឆ្នាំ២០១៩ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស គ.ជ.ប.ជ បានប្រារព្ធទិវាជាតិប្រយុទ្ធប្រឆាំងការជួញដូរមនុស្ស ១២ធ្នូ ឆ្នាំ២០១៩ លើកទី១៣ ក្រោមអធិបតីភាព សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធាន គ.ជ.ប.ជ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដោយមានការចូលរួមពី ព្រះជាគណៈ ព្រះថិរានុត្ថេរៈ សមាជិក សមាជិកានៃព្រឹទ្ធសភា រដ្ឋសភា ឯកអគ្គរាជទូត ឯកអគ្គរដ្ឋទូត និងតំណាងស្ថានបេសកកម្មប្រចាំកម្ពុជា តំណាងក្រសួង ស្ថាប័ននានា ក្រុមប្រឹក្សា អភិបាល រាជធានី-ខេត្ត អគ្គស្នងការ មេបញ្ជាការ កងកម្លាំងប្រដាប់អាវុធ គ្រប់ប្រភេទ តំណាងទីភ្នាក់ងារអង្គការសហប្រជាជាតិ និងអង្គការដៃគូអភិវឌ្ឍន៍ តំណាងអង្គការសង្គមស៊ីវិល ព្រមទាំងតំណាងស្ថាប័ន អង្គភាពពាក់ព័ន្ធជាច្រើន។
ទិវាជាតិប្រយុទ្ធប្រឆាំងការជួញដូរមនុស្ស ១២ធ្នូ ឆ្នាំ២០១៩ លើកទី១៣នេះ ត្រូវបានរៀបចំប្រារព្ធធ្វើឡើងនៅមជ្ឍមណ្ឌលសន្និបាតនិងពិព័រណ៍កោះពេជ្រ ក្រោមប្រធានបទ “បង្ហាញពីឆន្ទះដ៏មុះមុតរបស់រាជរដ្ឋាភិបាល និងប្រជាពលរដ្ឋគ្រប់រូបក្នុងការរួមគ្នាសហការគ្នាដើម្បីកម្ពុជាគ្មានអំពើជួញដូរមនុស្ស” ។ ដើម្បីជម្រុញកិច្ចសហការនានាលើសកម្មភាពប្រយុទ្ធប្រឆាំងអំពើជួញដូរមនុស្សឲ្យបានកាន់តែខ្លាំងក្លាបន្ថែមទៀត និងពង្រឹងការអនុវត្តសកម្មភាពនានារបស់អង្គភាពពាក់ព័ន្ធ តាមយុទ្ធសាស្ត្រដែលមានចែងក្នុងផែនការជាតិ ឲ្យបានកាន់តែមានប្រសិទ្ធភាពខ្ពស់៕ រតនា
ដោយ៖ នាយកដ្ឋានព័ត៌មានវិទ្យា