សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តី ក្រសួងមហាផ្ទៃ បានមានប្រសាសន៍ថា រាជរដ្ឋាភិបាលកម្ពុជានៅតែបន្តពង្រឹង និងពង្រីកទំនាក់ទំនងកិច្ចសហប្រតិបត្តិការ រវាងកម្ពុជា-ជប៉ុនឲ្យកាន់តែរឹងមាំ និងរីកចម្រើនឡើងថែមទៀត ជាពិសេសលើវិស័យពាណិជ្ជកម្ម និងវិនិយោគ។ ក្នុងជំនួបនាព្រឹកថ្ងៃពុធ ទី១៣ ខែធ្នូ ឆ្នាំ២០១៩ នាទីស្តីការក្រសួងរវាងសម្ដេចក្រឡាហោម និងគណៈប្រតិភូជប៉ុន សម្ដេចក្រឡាហោមក៏បានថ្លែងអំណរគុណចំពោះរដ្ឋាភិបាលជប៉ុន ដែលតែងជួយគាំទ្រដល់ដំណើរការស្វែងរកសន្តិភាព និងការអភិវឌ្ឍរបស់កម្ពុជាក្នុងពេលកន្លងមកផងដែរ។
ឯកឧត្តម Takahashi Furniaki បានមានប្រសាសន៍ថាក្នុងនាមប្រធានដឹកនាំគណៈប្រតិភូជប៉ុនមកកម្ពុជានៅពេលនេះ គឺដើម្បីស្វែងរកឱកាសវិនិយោគផ្សេងៗនៅកម្ពុជា និងក៏ជាឱកាសសម្រាប់បង្ហាញដល់គណៈប្រតិភូទាំងអស់អំពីអ្វីដែលមានជាក់ស្ដែងក្នុងព្រះរាជាណាចក្រកម្ពុជាផងដែរ ហើយជាពិសេសគឺបន្តខិតខំផ្សារភ្ជាប់ទំនាក់ទំនងជាមួយនឹងសហគ្រិនក៏ដូចជាវិនិយោគិនវ័យក្មេងរបស់ប្រទេសកម្ពុជា ក្នុងការធ្វើយ៉ាងណាស្វែងរកឱកាសវិនិយោគរួមគ្នារវាងក្រុមហ៊ុនឯកជនរបស់ជប៉ុនជាមួយនិងវិស័យឯកជនរបស់ព្រះរាជាណាចក្រកម្ពុជា។ ជាងនេះទៅទៀតឯកឧត្តមក៏បានសំណូមពរ សម្ដេចក្រឡាហោមដែលក្នុងនាមជាថ្នាក់ដឹកនាំស្ថាប័នសន្តិសុខជាតិ បន្តជួយដើម្បីធ្វើយ៉ាងណាពង្រឹងនូវវិស័យសន្តិសុខ សុវត្ថិភាពជូនដល់ប្រជាពលរដ្ឋ និងវិនិយោគិនជប៉ុន ក៏ដូចជាវិនិយោគិនបរទេសដទៃទៀត ដើម្បីបន្តទាក់ទាញពួកគេឱ្យចូលមកវិនិយោគនៅក្នុងប្រទេសកម្ពុជាឲ្យកាន់តែច្រើនឡើងថែមទៀត។
សម្ដេចក្រឡាហោម បានសម្ដែងនូវការគាំទ្រចំពោះចំណាប់អារម្មណ៍របស់ក្រុមហ៊ុនជប៉ុន ដែលមានបំណងមកសិក្សាស្វែងយល់ពីស្ថានភាពក៏ដូចជាចាប់អារម្មណ៍ទៅលើវិស័យមួយចំនួនរបស់កម្ពុជានាពេលនេះ។ សម្ដេចក្រឡាហោមបន្ថែមថា សម្តេចពិតជាចង់ឃើញ ការរីកដុះដាលរបស់ក្រុមហ៊ុនខ្នាតតូច និងមធ្យមឲ្យបានកាន់តែច្រើនឡើងថែមទៀត ដើម្បីពង្រីកវិសាលភាពទៅដល់គ្រប់ទីកន្លែងនៅតាមបណ្ដាលខេត្តនានាក្នុងព្រះរាជាណាចក្រកម្ពុជា។ សម្តេចក្រឡាហោមបន្តថា នេះក៏ជាការរួមចំណែកធ្វើឲ្យប្រជាជនដែលរស់នៅតាមជនបទ ក្នុងព្រះរាជាណាចក្រកម្ពុជាមានឱកាសក្នុងការស្វែងរកការងារ និងមានលទ្ធភាពក្នុងការបង្កបង្កើតអាជីវកម្ម ឬក៏អាជីពផ្សេងៗនៅមូលដ្ឋានរបស់ខ្លួនផងដែរ។ សម្ដេចក្រឡាហោម ពិតជារីករាយនិងទទួលយកនូវសំណើ ហើយនឹងបន្តខិតខំធ្វើយ៉ាងណាថែរក្សានូវសន្តិសុខ សុវត្ថិភាព ក៏ដូចជាជួយសម្របសម្រួលដល់ដំណើរការវិនិយោគរបស់វិនិយោគិននៅកម្ពុជាឲ្យសម្រេចបានជោគជ័យ។
ទន្ទឹមនោះសម្ដេចក្រឡាហោម ក៏បានស្នើដល់ក្រុមហ៊ុនទាំងអស់របស់ជប៉ុនដែលមានវត្តមានក្នុងថ្ងៃនេះ បន្តធ្វើការជាមួយនឹងផ្នែកពាក់ព័ន្ធ និងស្ថាប័នពាក់ព័ន្ធរបស់រាជរដ្ឋាភិបាលកម្ពុជា ក្នុងការធ្វើយ៉ាងណាសិក្សារកឱកាសដើម្បីដាក់ទុនវិនិយោគទៅលើវិស័យជំនាញនីមួយៗរបស់ក្រុមហ៊ុនខ្លួន។ ជាមួយគ្នានោះសម្ដេចក្រឡាហោម ក៏បានមានប្រសាសន៍ថានឹងត្រៀមខ្លួនជានិច្ចក្នុងការចូលរួមដោះស្រាយចំពោះបញ្ហាប្រឈមផ្សេងៗដែលក្រុមហ៊ុន ឬវិស័យឯកជនរបស់ជប៉ុនមាននៅកម្ពុជាផងដែរ៕ គឹមអាន
ដោយ៖ នាយកដ្ឋានព័ត៌មានវិទ្យា
