សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានមានប្រសាសន៍លើកឡើ់ងថា រាជរដ្ឋាភិបាលគឹមានគោលការណ៍ក្នុងការបន្តពង្រឹងឆន្ទៈភាពជាដៃគូរជាមួយអង្គការសង្គមស៊ីវិលក្នុងពេលបច្ចុប្បន្ន ក៏ដូចជានាពេលអនាគត ដើម្បីលើកកម្ពស់ភាពជាដៃគូនេះ ដែលជាក់ស្តែងកន្លងទៅ រដ្ឋាភិបាលតែងតែយកចិត្តទុកដាក់ក្នុងការដោះស្រាយនូវកង្វល់ សំណូមពរនានារបស់អង្គការសង្គមស៊ីវិល នៅពេលដែល ទទួលបាននូវព័ត៌មានជាក់លាក់ ហើយជាព័ត៌មានពិតប្រាកដ។ ថ្លែងក្នុងពិធីបិទសិក្ខាសាលាជាតិស្តីពីការរៀបចំផែនការសកម្មភាព និងថវិកា ឆ្នាំ២០២០ របស់គណៈកម្មាធិការជាតិសម្រាប់ការអភវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) កាលពីថ្ងៃទី០៥ ខែធ្នូ ឆ្នាំ២០១៩ នាទីស្តីការក្រសួងមហាផ្ទៃ។
សម្តេចក្រឡាហោមបានបន្តថា កន្លងមកមានការលើកឡើងថា រដ្ឋាភិបាលមិនយកចិត្តទុកដាក់ដោះស្រាយបញ្ហាមួយចំនួនជូនអង្គការសង្គមស៊ីវិល ប៉ុន្តែនេះគឺជាចំនុចដែលគ្មានមូលដ្ឋានច្បាស់លាស់ ដោយហេតុថា ព័ត៌មាន ឬបញ្ហាប្រឈមទាំងនោះ គឺមិនបានបញ្ជូនមកដល់រដ្ឋាភិបាលដើម្បីមានចំណាត់ការដោះស្រាយនោះឡើយ។ សម្តេចក្រឡាហោមបានបន្ថែមថា តាមរយៈស្ថានភាពខាងលើ សម្តេចក៏បានសរសេរក្នុងរបាយការណ៍ឆ្លើយតបទៅសហគមន៍អឺរ៉ុបផងដែរថា តាមយៈការត្អូញត្អែរអំពីការគំរាមកំហែង ការគាបសង្កត់ ក៏ប៉ុន្តែព័ត៌មានជាក់លាក់សម្តេចមិនបានទទួលនោះទេ ហើយសម្តេចតែងតែធ្វើការណែនាំ តាមគ្រប់រូបភាពទាំងអស់ក្នុងការរំឭកអំពីការលើកកម្ពស់ភាពជាដៃគូរជាមួយអង្គការសង្គមស៊ីវិលនេះ។ សម្តេចក្រឡាហោម ក៏បានលើកឡើងបន្ថែមដែរថា ដើម្បីពង្រឹងភាពជាដៃគូ ភាគីទាំងពីរត្រូវមានការតាំងចិត្តដូចគ្នា ប៉ុន្តែបើភាគីម្ខាងតាំងចិត្តថាពង្រឹងភាពជាដៃគូ តែម្ខាងទៀតមិនតាំងចិត្តក៏មិនអាចទៅរួចផងដែរ។
ជាមួយគ្នានោះដែរសម្តេចក្រឡាហោមបានបញ្ជាក់ថា ចំពោះរាល់កង្វល់ ឫមតិនានារបស់សង្គមស៊ីវិលរដ្ឋាភោបាលបានយកចិត្តទុកដាក់បំផុត រហូតដល់បានបង្កើតជាវេទិការយៈពេល ៦ ខែម្ដង ដើម្បីនឹងផ្លាស់ប្ដូរព័ត៌មានគ្នាទៅវិញទៅមក ក្នុងការលើកឡើងនូវកង្វល់បញ្ហាផ្សេងៗ ដោយមានប្រធានជារដ្ឋលេខាធិការរបស់ក្រសួងមហាផ្ទៃ និងមានសមាសភាពពីក្រសួងស្ថាប័ននានាចូលរួមផងដែរ ពិសេសពីក្រសួងការបរទេស ទីស្ដីការគណៈរដ្ឋមន្ត្រី និងក្រសួងយុត្តិធម៌ផងដែរ។ បន្ថែមលើសពីនេះ សម្តេចបានលើកទឹកចិត្តអោយក្រុមការងារទាំងអស់សិក្សាអោយអស់លទ្ធភាពអំពីច្បាប់ស្តីពីសមាគម និងអង្គការមិនមែនរដ្ឋាភិបាល ដើម្បីឈានទៅធ្វើវិសោធនកម្មច្បាប់នេះអោយកាន់តែល្អប្រសើរ ដូច្នេះបានន័យថាយើងមិនបានទុកចោលនូវកង្វល់ឬមតិនានារបស់អង្គការសង្គមស៊ីវិលនោះទេ ទាំងអង្គការសង្គមស៊ីវិលដែលធ្វើការងារតស៊ូមតិ និងអង្គការសង្គមស៊ីវិលដែលធ្វើការងារអភិវឌ្ឍន៍។
សម្តេចក្រឡហោមក៏បានអំពាវនាវដល់អង្គការសង្គមស៊ីវិលសូមចូលរួមលើកកម្ពស់ភាពជាដៃគូរជាមួយនឹងរដ្ឋាភិបាល ដើម្បីសហការរួមគ្នាសម្រាប់ផលប្រយោជន៍ទាំងអស់គ្នា។ រាជរដ្ឋាភិបាលមិនចាត់ទុក អង្គការសង្គមស៊ីវិលដែលធ្វើការតស៊ូមតិនោះគឺជាអ្នកប្រឆាំងទេ ប៉ុន្តែជាមួយគ្នានោះមតិទាំងនោះត្រុវផ្តល់ប្រយោជន៍រួមសម្រាប់សង្គមជាតិទាំងមូល៕ គឹមអាន
ដោយ៖ នាយកដ្ឋានព័ត៌មានវិទ្យា