នៅទីស្តីការក្រសួងមហាផ្ទៃ នារសៀលថ្ងៃព្រហស្បតិ៍ ទី០៥ ខែធ្នូ ឆ្នាំ២០១៩ គណៈកម្មាធិការប្រយុទ្ធប្រឆាំងផលិតផលក្លែងក្លាយ បានរៀបចំកម្មវិធីបិទវគ្គបណ្តុះបណ្តាលស្តីពី "ក្រមនីតិវិធីព្រហ្មទណ្ឌ និងតួនាទី ភារកិច្ចមន្រ្តីនគរបាលយុត្តិធម៌ វគ្គ២" ក្រោមអធិបតីភាព ឯកឧត្តម នាយឧត្តមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការ គ.ប.ផ.ក ដោយមានការចូលរួមពី ថ្នាក់ដឹកនាំ នៃគណៈកម្មាធិការ គ.ប.ផ.ក សាស្រ្តាចារ្យ និងសិក្ខាកាមជាច្រើនរូបផងដែរ។

      ក្នុងឱកាសនេះ ឯកឧត្តម មៀច សុផាន់ណា បានមានប្រសាសន៍កោតសរសើរចំពោះការខិតខំប្រឹងប្រែងរបស់គ្រូឧទ្ទេសនាម និងសិក្ខាកាមទាំងអស់ដែលបានយកចិត្តទុកដាក់បណ្តុះបណ្តាល និងសិក្សាចាប់តាំងពីដើមរហូតដល់ចប់កម្មវិធីដោយជោគជ័យ។

      ឯកឧត្តម ក៏បានផ្តាំផ្ញើ និងណែនាំដល់មន្រ្តីសិក្ខាកាមទាំងអស់ឲ្យយកចំណេះដឹងដែលបានពីការរៀនសូត្រនេះយកទៅអនុវត្តការងារប្រកបដោយប្រសិទ្ធភាពខ្ពស់ និងសម្រេចបានជោគជ័យ ហើយក្រោយកម្មវិធីបិទវគ្គបណ្តុះបណ្តាលនោះ ឯកឧត្តម មៀស សុផាន់ណា ក៏បានអញ្ជើញជាអធិបតីជូនកាដូរអនុស្សាវរីយ៍ដល់គ្រូឧទ្ទេសនាម និងចែកវិញ្ញាប័នបត្របញ្ជាក់ការសិក្សាជូនដល់ថ្នាក់ដឹកនាំ និងមន្រីនគរបាលជាតិជាសិក្ខាកាមទាំងអស់ផងដែរ។

      សូមបញ្ជាក់ថា វគ្គបណ្តុះបណ្តាលនេះមានរយៈពេលពីរថ្ងៃ គីនៅថ្ងៃទី០៤ និងថ្ងៃទី០៥ ខែធ្នូ ឆ្នាំ២០១៩ ក្នុងគោលបំណងដើម្បីផ្ដល់ចំណេះដឹងបន្ថែមដល់មន្រ្តីអនុវត្តច្បាប់នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក)អំពីនីតិវិធីអនុវត្តច្បាប់ផ្សេងៗ ក្នុងគោលបំណង ដើម្បីពង្រឹងមន្រ្តីអនុវត្តច្បាប់ឲ្យកាន់តែមានសមត្ថភាព ពេលចុះប្រតិបត្តិការបង្រ្កាបផលិតផលក្លែងក្លាយ និងហានិភ័យរបស់សមត្ថកិច្ចជំនាញ ពេលដែលចុះបង្រ្កាបទីតាំងផលិតផលក្លែងក្លាយ៕ រតនា

ដោយ៖ នាយកដ្ឋានព័ត៌មានវិទ្យា