នារសៀលថ្ងៃព្រហស្បតិ៍ ទី០៥ ខែធ្នូ ឆ្នាំ២០១៩ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធាន គ.ជ.អ.ប បានអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសិក្ខាសាលាជាតិស្តីពីការរៀបចំផែនការសកម្មភាព និងថវិកា ឆ្នាំ២០២០ របស់លេខាធិការដ្ឋាននៃគណៈកម្មាធិការជាតិសម្រាប់ការអភវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) នៅទីស្តីការក្រសួងមហាផ្ទៃ ដោយមានការចូលរួមពី ទេសរដ្ឋមន្រ្តី រដ្ឋមន្ត្រីប្រតិភូអមនាយករដ្ឋមន្រ្តី តំណាងក្រសួង ស្ថាប័ននានា តំណាងគណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការក្រសួង ស្ថាប័នពាក់ព័ន្ធ ថ្នាក់ដឹកនាំក្រសួងមហាផ្ទៃ និងលេខាធិការដ្ឋាន គ.ជ.អ.ប អភិបាលរាជធានី-ខេត្ត អង្គការដៃគូនានា និងអង្គភាព ស្ថាប័នពាក់ព័ន្ធជាច្រើន។
សិក្ខាសាលាស្តីពីការរៀបចំផែនការសកម្មភាព និងថវិកាឆ្នាំ២០២០ របស់គ.ជ.អ.ប នេះក៏បានផ្តល់ឱកាសឱ្យមានការពិភាក្សា ពិគ្រោះយោបល់គ្នាដើម្បីស្វែងដំណោះស្រាយ និងការឯកភាពគ្នាលើសេចក្តីព្រាងនេះ ដើម្បីឱ្យស្របតាមកំណែទម្រង់រដ្ឋបាលសាធារណៈ ដែលជាកម្មវិធីកំណែទម្រង់មួយ ក្នុងចំណោមកម្មវិធីកំណែ ទម្រង់សំខាន់ៗរបស់រាជរដ្ឋាភិបាលដែលបានចាប់ផ្តើមអនុវត្តតាំងពីឆ្នាំ២០០០ ដែលបានចូលរួមចំណែកជាមួយកម្មវិធីកំណែទម្រង់ផ្សេងៗទៀតដើម្បីអនុវត្តឲ្យបានសម្រេចនូវកម្មវិធីនយោបាយ និងយុទ្ធសាស្រ្តចតុកោណរបស់រាជរដ្ឋាភិបាល ជាពិសេសការធ្វើទំនើបកម្មប្រព័ន្ធអភិបាលកិច្ច ដើម្បីសម្រេចឲ្យបាននូវគោលដៅយុទ្ធសាស្រ្តសម្រាប់កំណើនការងារ សមធម៌ និងប្រសិទ្ធភាព៕ រតនា
ដោយ៖ នាយកដ្ឋានព័ត៌មានវិទ្យា