នៅទីស្តីការក្រសួងមហាផ្ទៃ នាព្រឹកថ្ងៃព្រហស្បតិ៍ ទី០៥ ខែធ្នូ ឆ្នាំ២០១៩ លេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានបើកសិក្ខាសាលាជាតិស្តីពីការរៀបចំផែនការសកម្មភាព និងថវិកា ឆ្នាំ២០២០ របស់គណៈកម្មាធិការជាតិសម្រាប់ការអភវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ក្រោមអធិបតីភាព ឯកឧត្តមកិត្តិបណ្ឌិត ពេជ្រ ប៊ុនធិន រដ្ឋមន្រ្តីក្រសួងមុខងារសាធារណៈ ដោយមានការចូលរួមពី តំណាងក្រសួង ស្ថាប័ននានា តំណាងគណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការក្រសួង ស្ថាប័នពាក់ព័ន្ធ ថ្នាក់ដឹកនាំក្រសួងមហាផ្ទៃ និងលេខាធិការដ្ឋាន គ.ជ.អ.ប អភិបាលរាជធានី-ខេត្ត អង្គការដៃគូនានា និងអង្គភាព ស្ថាប័នពាក់ព័ន្ធជាច្រើន។
ថ្លែងក្នុងឱកាសបើកសិក្ខាសាលានេះ ឯកឧត្តមកិត្តិបណ្ឌិត ពេជ្រ ប៊ុនធិន បានមានប្រសាសន៍ថា ការរៀបចំផែនការសកម្មភាពសម្រាប់ឆ្នាំ២០២០ របស់គ.ជ.អ.ប នេះត្រូវបានគិតគូរប្រមូលផ្តុំនូវបញ្ហាជាអាទិភាពនានាដែលបានកំណត់ក្នុងកម្មវិធីជាតិ១០ឆ្នាំ ហើយអ្វីមិនទាន់អាចសម្រេចបានក្នុងបណ្តាឆ្នាំកន្លងមក ព្រមជាមួយនិងបញ្ហាជាអាទិភាពនានាគឺគ្រោងសម្រេចឲ្យបាននាឆ្នាំចុងក្រោយនៃកម្មវិធីជាតិនេះ ដោយផ្អែកលើមូលដ្ឋាននៃកម្មវិធីនយោបាយ យុទ្ធសាស្រ្តចតុកោណដំណាក់កាលទី៤ និងផែនការយុទ្ធសាស្រ្តអភិវឌ្ឍជាតិ(២០១៩-២០២៣) ព្រមទាំងផ្អែកលើមូលដ្ឋាននៃការរីកចម្រើននៃសេដ្ឋកិច្ច និងសង្គម។ សកម្មភាពជាអាទិភាពនានាដែលត្រូវបានគ្រោងក្នុងសេចក្តីព្រាងបឋមនៃផែនការសកម្មភាព និងថវិកាសម្រាប់ឆ្នាំ២០២០ របស់គ.ជ.អ.ប ដែលនឹងត្រូវយកមកពិនិត្យ និងពិភាក្សាគ្នាក្នុងសិក្ខាសាលានេះ ក៏មានការជជែកពិភាក្សាគ្នាជាបឋមជាមួយក្រុមការងារតំណាងក្រសួង ស្ថាប័នអនុវត្តនាពេលកន្លងមកផងដែរ។ ឯកឧត្តម ក៏បានបន្តថា សេចក្តីព្រាងបឋមនៃផែនការសកម្មភាព និងថវិកាឆ្នាំ២០២០នេះ បានរៀបចំឡើងដោយផ្អែកទៅលើគម្រោងថវិកាសរុបប្រមាណជាង ៣,៥ទ្រីលានរៀល ឬមានចំនួនប្រមាណជិត ៩០០ លានដុល្លារអាមេរិក ដែលក្នុងនោះថវិការដ្ឋប្រមាណជិត ៩៥% និងថវិកាចូលរួមចំណែកពីដៃគូអភិវឌ្ឍន៍ប្រមាណជាង ៥% ដោយក្នុងនោះថវិកាសម្រាប់រដ្ឋបាលថ្នាក់ក្រោមជាតិ មានចំនួនប្រមាណជាង ៣,៤ ទ្រីលានរៀល ឬមានចំនួនប្រមាណជាង៨៥៥លានដុល្លារអាមេរិក។ បើប្រៀបធៀបនឹងឆ្នាំ២០១៩ ថវិការបស់រដ្ឋបាល ថ្នាក់ក្រោមជាតិឆ្នាំ២០២០ខាងមុខនេះ មានចំនួនកើនឡើងប្រមាណជិត ១,១ទ្រីលានរៀល ឬ មានចំនួនប្រមាណជាង២៧៦លានដុល្លារអាមេរិក ដោយសារការបង្កើនអត្រាចូលរួមពីថវិការដ្ឋទៅក្នុងមូលនិធិឃុំ សង្កាត់ មូលនិធិក្រុង ស្រុក និងការបង្កើតឱ្យមាននូវប្រភពចំណូលផ្សេងៗទៀតសម្រាប់រដ្ឋបាលថ្នាក់ក្រោមជាតិ។ ឯកឧត្តមបានបន្ថែមថា ដើម្បីអនុវត្តកម្មវិធីជាតិកំណែទម្រង់រដ្ឋបាលសាធារណៈនេះឱ្យបានសមស្រប ផែនការសកម្មភាពនេះ បានកំណត់នូវចក្ខុវិស័យដ៏ច្បាស់លាស់មួយគឺ ការធានាឲ្យបាននូវរដ្ឋបាលសាធារណៈផ្តោតលើប្រជាជនជាស្នូលដែលមានលក្ខណៈខ្លាំង ស្អាតស្អំ និងឆ្លាតវៃ។ មន្រ្តីរាជការសាធារណៈត្រូវប្រកាន់យកគោលការណ៍សុចរិតធម៌ បំពេញការងារដោយតម្លាភាព គណនេយ្យភាព និងការទទួលខុសត្រូវ ឈរលើអភិក្រម ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់។ ឯកឧត្តមបានគូសបញ្ជាក់បន្ថែមថា ដើម្បីសម្រេចបាននូវចក្ខុវិស័យសម្រាប់ផែនការសកម្មភាព និងថវិកា ឆ្នាំ២០២០នេះនឹងប្រើប្រាស់នូវយុទ្ធសាស្រ្តចំនួន៣គឺ៖ ១.ការជំរុញនវានុវត្តន៍ និងការប្រើប្រាស់បច្ចេកវិទ្យាព័ត៌មានក្នុងរដ្ឋបាលសាធារណៈ, ២.ការជំរុញនិងការដាក់ឲ្យអនុវត្តប្រព័ន្ធគ្រប់គ្រងផ្អែកលើសមិទ្ធកម្ម, និង ៣.ការផ្សារភ្ជាប់សកម្មភាពកំណែទម្រង់រដ្ឋបាលសាធារណៈជាមួយនឹងកម្មវិធីកែទម្រង់នានារបស់រាជរដ្ឋាភិបាល។
សូមបញ្ជាក់ដែរថា ផែនការសកម្មភាព និងថវិកា ឆ្នាំ២០២០នេះនឹងត្រូវដាក់ឲ្យអនុវត្តជាបីដំណាក់កាលដូចខាងក្រោម៖ ដំណាក់កាលទី១(២០១៩-២០២៣)៖ ជាដំណាក់កាលការពង្រឹងសមិទ្ធកម្មក្នុងរដ្ឋបាលសាធារណៈ ដោយផ្តោតលើការកែទម្រង់និងការលើកកម្ពស់សមត្ថភាពស្ថាប័នសាធារណៈ ការពង្រឹងភាពស្អាតស្អំក្នុងរដ្ឋបាលសាធារណៈ និងការពង្រឹងប្រសិទ្ធភាពនៃការអនុវត្តការងារ។ ដំណាក់កាលទី២ (២០២៣-២០២៧) ជាដំណាក់កាលនៃការអនុវត្តនិងការត្រួតពិនិត្យវាយតម្លៃប្រព័ន្ធគ្រប់គ្រងផ្អែកលើសមិទ្ធកម្មក្នុងរដ្ឋបាលសាធារណៈដោយផ្តោតលើការបន្តពង្រឹងសមិទ្ធកម្មក្នុងរដ្ឋបាលសាធារណៈ ការដាក់ឲ្យអនុវត្ត និងការត្រួតពិនិត្យវាយតម្លៃប្រព័ន្ធគ្រប់គ្រងផ្អែកលើសមិទ្ធកម្ម។ ដំណាក់កាលទី៣ (២០២៧-២០៣០) ជាដំណាក់កាលនៃការលើកកម្ពស់គណនេយ្យភាពសមិទ្ធកម្មចំពោះសេវាសាធារណៈ ដោយផ្តោតទៅលើការបន្តអនុវត្ត និងការត្រួតពិនិត្យវាយតម្លៃប្រព័ន្ធគ្រប់គ្រងសមិទ្ធកម្មក្នុងរដ្ឋបាលសាធារណៈ ការផ្តល់សេវាសាធារណៈប្រកបដោយឧត្តមភាព និងការត្រួតពិនិត្យវាយតម្លៃគណនេយ្យភាពសមិទ្ធកម្មចំពោះសេវាសាធារណៈ៕ រតនា
ដោយ៖ នាយកដ្ឋានព័ត៌មានវិទ្យា