នៅទីស្តីការក្រសួងមហាផ្ទៃ នារសៀលថ្ងៃពុធ ទី០៤ ខែធ្នូ ឆ្នាំ២០១៩ គណៈកម្មាធិការប្រយុទ្ធប្រឆាំងផលិតផលក្លែងក្លាយ បានបើកវគ្គបណ្តុះបណ្តាលស្តីពី "ក្រមនីតិវិធីព្រហ្មទណ្ឌ និងតួនាទី ភារកិច្ចមន្រ្តីនគរបាលយុត្តិធម៌ វគ្គ២" ដល់ថ្នាក់ដឹកនាំ មន្ត្រីនគរបាលជាតិ នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ក្រោមអធិបតីភាព ឯកឧត្តម ឧត្តមសេនីយ៍ឯក សរ សិទ្ធ តំណាងឱ្យឯកឧត្តម នាយឧត្តមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការ គ.ប.ផ.ក ដោយមានការចូលរួមពី ថ្នាក់ដឹកនាំ នៃគណៈកម្មាធិការ គ.ប.ផ.ក សាស្រ្តាចារ្យ និងសិក្ខាកាមជាច្រើនរូបផងដែរ។
វគ្គបណ្ដុះបណ្ដាលនេះ គឺធ្វើឡើងក្នុងគោលបំណង ដើម្បីផ្ដល់ចំណេះដឹងបន្ថែមដល់មន្រ្តីអនុវត្តច្បាប់នៃគណៈកម្មាធិការ (គ.ប.ផ.ក) អំពីនីតិវិធីអនុវត្តច្បាប់ផ្សេងៗ ដែលមានចែងក្នុងក្រមនីតិវីធីព្រហ្មទណ្ឌ និងតួនាទី ភារកិច្ច មន្រ្តីនគរបាលយុត្តិធម៌ និងដើម្បីពង្រឹងដល់មន្រ្តីអនុវត្តច្បាប់ឲ្យកាន់តែមានសមត្ថភាព ពេលចុះបង្រ្កាបផលិតផលក្លែងក្លាយ និងហានិភ័យរបស់សមត្ថកិច្ចជំនាញ ពេលដែលចុះបង្រ្កាបទីតាំងផលិតផលក្លែងក្លាយ ដែលបានផ្តោតលើនីតិវិធីសំខាន់ៗចំនួន០៣រួមមាន៖
១.នីតិវិធី នៃការប្រមូលសំណាក និងភស្តុតាង ដើម្បីដាក់បន្ទុក និងដាក់ជូនតុលាការ
២.បទពិសោធន៍នីតិវិធីព្រហ្មទណ្ឌ និងភារកិច្ចមន្ត្រីនគរបាលយុត្តិធម៌
៣.បញ្ហាប្រឈម វិធីការពារ និងដំណោះស្រាយ ដែលអាចកើតមានឡើងអំឡុងពេល។
សម្រាប់វគ្គបណ្ដុះបណ្ដាលនេះ មានវាគ្មិន គឺលោកឧត្តមសេនីយ៍ត្រី អៀង ណាវី គ្រូនគរបាលជាតិ នៃសាលាបណ្ឌិត្យសភានគរបាលកម្ពុជា លោកឧត្តមសេនីយ៍ទោ ប៉ាល់ សុធី អនុប្រធាននាយកដ្ឋានព្រហ្មទណ្ឌ និងឯកឧត្តម ស្វាយ សំណាង អគ្គព្រះរាជអាជ្ញារង នៃមហាអយ្យការអមសាលាឧទ្ធរណ៍ ដែលនឹងធ្វើជាគ្រូឧទ្ទេសក្នុងការណែនាំ និងបង្ហាត់បង្រៀនដល់សិក្ខាកាម៕ រតនា
ដោយ៖ នាយកដ្ឋានព័ត៌មានវិទ្យា