នារសៀលថ្ងៃពុធ ទី០៤ ខែធ្នូ ឆ្នាំ២០១៩នេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអនុញ្ញាតឱ្យលោកជំទាវ Angela Corcoran ឯកអគ្គរដ្ឋទូតអូស្រ្តាលីចប់បេសកកម្មការទូតនៅព្រះរាជាណាចក្រកម្ពុជា ព្រមទាំងសហការី ចូលជួបជម្រាបលា នាទីស្តីការក្រសួងមហាផ្ទៃ។
សម្ដេចក្រឡាហោម ស ខេង បានស្វាគមន៍លោកជំទាវ ឯកអគ្គរដ្ឋទូត និងអបអរសាទរលោកជំទាវដែលបានទទួលគ្រឿងឥស្សរយសពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលលោកជំទាវបានចូលរួមចំណែកក្នុងការអភិវឌ្ឍន៍រឹតបន្តឹងចំណងមិត្តភាព និងកិច្ចសហប្រតិបត្តិការរវាងប្រទេសអូស្ត្រាលី និងកម្ពុជាកន្លងមក។
ក្នុងឱកាសនោះដែរ លោកជំទាវ ឯកអគ្គរដ្ឋទូត បានវាយតម្លៃខ្ពស់ចំពោះទំនាក់ទំនងកិច្ចសហប្រតិបត្តិការរវាងកម្ពុជា និងអូស្ត្រាលី ដែលមានក្នុងរយៈពេលកន្លងមក ដោយប្រទេសអូស្ត្រាលី បានផ្ដល់ជំនួយអភិវឌ្ឍន៍ដល់ប្រទេសកម្ពុជាមានចំនួនទឹកប្រាក់សរុប ១.៣ ប៊ីលានដុល្លារអូស្ត្រាលី នៅក្នុងវិស័យកសិកម្ម វិស័យហេដ្ឋារចនាសម្ព័ន្ធ ការដោះមីន វិស័យសុខាភិបាល និងវិស័យអប់រំ។ លោកជំទាវក៏បានវាយតំលៃខ្ពស់ចំពោះកិច្ចសហប្រតិបត្តិការរវាងក្រសួងមហាផ្ទៃកម្ពុជាជាមួយ និងប្រទេសអូស្ត្រាលី លើការងារសន្តិសុខក្នុងតំបន់ និងការប្រឆាំងបទឧក្រិដ្ឋឆ្លងដែននានា ដែលកន្លងមក ប៉ូលិសសហព័ន្ធអូស្ត្រាលីជាមួយនគរបាលជាតិកម្ពុជា សម្រេចបាននូវលទ្ធផលជាផ្លែផ្កាជាច្រើនដូចជា ការឃាត់ខ្លួន និងបញ្ជូនខ្លួនជនល្មើសដែលពាក់ព័ន្ធទៅនឹងការរំលោភបំពានផ្លូវភេទ ការទប់ស្កាត់ឧក្រិដ្ឋកម្មឆ្លងដែនដូចជា ការជួញដូរគ្រឿងញៀន ការលាងលុយកខ្វក់ជាដើម។
ស្របជាមួយគ្នានេះ សម្ដេចក្រឡាហោម ក៏បានស្នើដល់ភាគីអូស្រ្តាលីឲ្យបន្តការគាំទ្រដល់ប្រទេសកម្ពុជា ដោយក្នុងនោះពាក់ព័ន្ធលើវិស័យសន្តិសុខ សម្តេចក្រឡាហោម បានស្នើដល់ភាគីអូស្ត្រាលីជួយអភិវឌ្ឍន៍លើផ្នែកធនធានមនុស្សក្នុងជួរកងកម្លាំងនគរបាលជាតិកម្ពុជាផងដែរ។
ជាការឆ្លើយតប លោកជំទាវ ឯកអគ្គរដ្ឋទូត បានមានប្រសាសន៍ថា អូស្ត្រាលីនឹងបន្តជួយអភិវឌ្ឍវិស័យធនធានមនុស្សនៅកម្ពុជា ក៏ដូចជាក្រសួងមហាផ្ទៃកម្ពុជា តាមរយៈការផ្ដល់ជាអាហារូបករណ៍ទៅសិក្សានៅប្រទេសអូស្ត្រាលី។ ជាងនេះទៀតលោកជំទាវក៏បានថ្លែងអរគុណចំពោះសម្ដេចក្រឡាហោម ស ខេង ដែលតែងតែជួយគាំទ្រចំពោះការងារក្នុងអាណត្តិរបស់លោកជំទាវក្នុងប្រទេសកម្ពុជា ដែលសម្រេចបាននូវសមិទ្ធផលជាច្រើនហើយលោកជំទាវក៏សង្ឃឹមថា សមិទ្ធផលដែលសម្រេចបានទាំងនេះនឹងបន្តអភិវឌ្ឍន៍បន្ថែមជាមួយឯកអគ្គរដ្ឋទូតថ្មីដែលនឹងបន្តនៅពេលខាងមុខ៕ រតនា
ដោយ៖ នាយកដ្ឋានព័ត៌មានវិទ្យា
