ឯកឧត្តម នាយឧត្តមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ ជាប្រធានគណៈកម្មាធិការ គ.ប.ផ.ក និងជាប្រធានក្រុមការងារប្រឆាំងឧក្រិដ្ឋកម្មឆ្លងដែនក្នុងក្របខ័ណ្ឌអាស៊ាន (SOMTC-Leader) តំណាងដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដឹកនាំប្រតិភូចូលរួមប្រជុំរដ្ឋមន្ត្រីអាស៊ានលើកទី១៣ ស្តីពីឧក្រិដ្ឋកម្មឆ្លងដែន (AMMTC-13) និងកិច្ចប្រជុំពាក់ព័ន្ធផ្សេងទៀតកាលពីថ្ងៃពុធ ទី២៧ ខែវិច្ឆិកា ឆ្នាំ២០១៩ នៅទីក្រុងបាងកក ប្រទេសថៃ ។
ក្នុងកិច្ចប្រជុំនោះ ឯកឧត្តមប្រធានគណៈប្រតិភូបានមានប្រសាសន៍ និងបញ្ជាក់ថា ឧក្រិដ្ឋកម្មឆ្លងដែនបានបង្កគ្រោះថ្នាក់ដ៏ធ្ងន់ធ្ងរដល់ប្រទេសជាច្រើនក្នុងទស្សវត្សទី២០កន្លងមក ហើយការខ្វះខាតនូវគោលនយោបាយដ៏ជាក់លាក់ ប្រទាក់ក្រឡាគ្នាក្នុងកំរិតអន្តរជាតិក្នុងពេលដែលឧក្រិដ្ឋកម្មឆ្លងដែនកាន់តែកើនឡើងនោះ សន្តិសុខពិភពលោកទាំងមូលត្រូវបានគំរាមកំហែងយ៉ាងខ្លាំងក្នុងសតវត្សទី២១នេះ។ ឯកឧត្តម នាយឧត្តមសេនីយ៍ មៀច សុផាន់ណា បានស្នើឲ្យមានគោលនយោបាយសម្រាប់អនុវត្ត និងឆ្លើយតបក្នុងកំរិតថ្នាក់តំបន់ ដើម្បីដោះស្រាយបញ្ហានេះ ពីព្រោះពុំមានប្រទេសណាមួយអាចដោះស្រាយបញ្ហានេះតែឯងបានទេ។ ឯកឧត្តម នាយឧត្តមសេនីយ៍ ក៏បានថ្លែងអំណរគុណដល់រាជរដ្ឋាភិបាលថៃ និងអគ្គលេខាធិការដ្ឋានអាស៊ាន ដែលបានរួមគ្នារៀបចំកិច្ចប្រជុំថ្នាក់រដ្ឋមន្ត្រីនេះឡើង។
បន្ទាប់ពីប្រជុំពាក់ពន្ធ័ឧក្រិដ្ឋកម្មឆ្លងដែន នាល្ងាចថ្ងៃដដែល ឯកឧត្តម នាយឧត្តមសេនីយ៍ មៀច សុផាន់ណា បានបន្តដឹកនាំគណ:ប្រតិភូកម្ពុជា ចូលរួមកិច្ចប្រជុំទ្វេភាគី ជាមួយគណៈប្រតិភូជាន់ខ្ពស់ចិន ដោយបានពិភាក្សាលេីការងារពង្រឹង ការការពារ សន្តិសុខ និងសុវត្ថិភាពប្រជាជន នៅក្រុងព្រះសីហនុ ខេត្តកំពុងសោម និងការបង្កេីនអាហាររូបករណ៍នៅប្រទេសចិន។
នាឱកាសនោះ ភាគីចិនក៏បានមានមតិចូលរួមគាំទ្រដល់រាជរដ្ឋាភិបាលកម្ពុជាក្នុងការបិទល្បែងសុីសងតាមប្រពន្ធ័អុីនធឺណិតផងដែរ(Game Online)៕
