អាជ្ញាធរជាតិប្រយុទ្ធប្រឆាំងគ្រឿងញៀនបន្តផ្សព្វផ្សាយបង្ការទប់ស្កាត់បញ្ហាគ្រឿងញៀនដល់សិស្សានុសិស្សក្នុងគ្រឹះស្ថានអប់រំ សាលារៀនក្រោមកិច្ចសហការជាមួយក្រសួងអប់រំ យុវជន និងកីឡា អគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន នៅមន្ទីរអប់រំ យុវជន និងកីឡាខេត្តកោះកុង មានបេីកវគ្គផ្សព្វផ្សាយពីគ្រោះថ្នាក់នៃគ្រឿងញៀននិងសុវត្ថិភាពចរាចរណ៍ផ្លូវគោកក្រោមអធិបតីភាពឯកឧត្តម ស សុខា រដ្ឋលេខាធិការ តំណាងឯកឧត្តម បណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ដោយមានការអញ្ជេីញចូលរួមពីឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា អគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន លោក ផៃធូន ផ្លាមកេសន អភិបាលរង តំណាងគណកម្មាធិការត្រួតពិនិត្យគ្រឿងញៀនខេត្ត តំណាងក្រុមប្រឹក្សាយុវជន យុវជនកាយរិទ្ធ សសយក សរុបជិត២០០នាក់។
លោក ជូ សេរីយា ប្រធានមន្ទីរ អប់រំ យុវជន និងកីឡាខេត្ត បានស្វាគមន៍និងបានជម្រាបជូនពីកិច្ចខិតខំអនុវត្តនូវផែនការប្រយុទ្ធប្រឆាំងគ្រឿងញៀនខុសច្បាប់តាមសាលារៀន បំផុសឲ្យមានការចូលរួមរបស់សិស្សានុសិស្ស លោកគ្រូអ្នកគ្រូ បុគ្គលិកសិក្សា កាន់តែសកម្មផុសផុសបង្ការទប់ស្កាត់ប្រឆាំងគ្រឿងញៀន។
លោក ផៃធូន ផ្លាមកេសន អភិបាលខេត្តស្តីទី ប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្តបានមានប្រសាសន៍ថា ខេត្តកោះកុង មិនជាទីតាំងផលិត ដាំដុះ ចរាចរណ៍គ្រឿងញៀនឡេីយ ដែលសមត្ថកិច្ចនិងអ្នកពាក់ព័ន្ធទាំងអស់ខិតខំបង្ការ បង្រ្កាប បទល្មេីសគ្រឿងញៀននិងស្តារនីតិសម្បទាអ្នកញៀនគ្រឿងញៀន។
ក្នុងនាមឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ ឧត្ដមសេនីយ៍ទោ លឹម តុងហួត បានមានប្រសាសន៍ថា បញ្ហាគ្រឿងញៀន និងបញ្ហាចរាចរណ៍ គឺជាបញ្ហាចម្បងដែលយើងទាំងអស់គ្នាត្រូវតែចូលរូមឲ្យបានសកម្មបង្ការទប់ស្កាត់បញ្ហាទាំងពីរ ការពារបាននូវអាយុជិវិតអនាគតខ្លួនឯង ដើម្បីភាពរីកចម្រើនដល់ខ្លួនឯង ក្រុមគ្រួសារ និងសង្គមជាតិ ហើយការលុបបំបាត់បញ្ហាគ្រឿងញៀនគឺផ្តើមចេញពីយើងទាំងអស់គ្នា។
ក្នុងនាមឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តី ឯកឧត្តម ស សុខា រដ្ឋលេខាធិការ បានអំពាវនាវសុំឲ្យអ្នកពាក់ព័ន្ធទាំងអស់ចូលរួមបង្ការទប់ស្កាត់បញ្ហាគ្រឿងញៀន អេដស៍ និងសុវត្ថិភាពចរាចរណ៍ដេីម្បីអនាគតយេីងទាំងអស់គ្នា និងបានសំណូមពរដល់:
១. មន្ទីរអប់រំ យុវជន និងកីឡា ខេត្ត ពិនិត្យលទ្ធភាពរៀបចំចងក្រងយន្តការគ្រប់គ្រង ព័ត៌មានទាន់ហេតុការណ៍ និងរបាយការណ៍ទាន់ពេលវេលា នៅគ្រប់កម្រិតរដ្ឋបាលគ្រប់គ្រង រួមមានក្រុមការងារនៅថ្នាក់មន្ទីរអប់រំ យុវជន និងកីឡាខេត្ត ក្រុមការងារនៅតាមការិយាល័យអប់រំ យុវជន និងកីឡា ក្រុង/ស្រុក និងក្រុមការងារនៅតាមគ្រឹះស្ថានសិក្សាសាធារណៈនិងឯកជន។
២. គ្រប់គ្រឹះស្ថានសិក្សាសាធារណៈ និងឯកជន ពង្រឹងចលនាក្រុមប្រឹក្សាកុមារ/យុវជន ជាចលករសម្រាប់ការងារផ្សព្វផ្សាយ អប់រំបន្តនៅក្នុងក្រុម គ្រឹះស្ថានសិក្សា និងតាមសហគមន៍ ពីគ្រោះថ្នាក់បង្ករដោយការប្រើប្រាស់គ្រឿងញៀន និងការអប់រំពីការគោរពច្បាប់ចរាចរណ៍។
៣.ជំរុញនិងលើកកម្ពស់ចលនាអប់រំកាយជាប្រចាំ និងកីឡាសិស្ស/យុវជន ដើម្បីការអភិវឌ្ឍវិន័យ និងសុខភាពល្អ។
៤. ជំរុញបន្តការចូលរួមគ្រប់គ្រឹះស្ថានសិក្សាឱ្យមានភាពគគ្រឹកគគ្រេង ក្នុងទិវាអន្តរជាតិប្រយុទ្ធប្រឆាំងគ្រឿងញៀន២៦ ខែមិថុនា និងទិវាជាតិប្រយុទ្ធប្រឆាំងអំពើជួញដូរមនុស្ស។
៥. សិស្សនុសិស្សបន្តជួយផ្សព្ធផ្សាយបន្តដល់ក្រុមគ្រួសារ និងមនុស្សជាទីស្រឡាញ់ពីគ្រោះថ្នាក់នៃគ្រឿងញៀនដើម្បីគាត់ចៀសចាកឆ្ងាយពីបញ្ហាគ្រឿងញៀន៕
ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន