នៅទីស្តីការក្រសួងមហាផ្ទៃ នាព្រឹកថ្ងៃពុធ ទី២០ ខែវិច្ឆិកា ឆ្នាំ២០១៩ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បើកកិច្ចប្រជុំលើកទី១៧ ក្រោមអធិបតីភាពដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធាន គ.ជ.អ.ប ដោយមានការចូលរួមពី សមាជិករបស់ គ.ជ.អ.ប ប្រធានស្ថាប័នពាក់ព័ន្ធ ក្រុមការងារបច្ចេកទេសវិមជ្ឈការ និងវិសហមជ្ឈការ ថ្នាក់ដឹកនាំ គ.ជ.អ.ប អភិបាលរាជធានី-ខេត្តផងដែរ។
កិច្ចប្រជុំនេះធ្វើឡើងក្នុងគោលបំណងត្រួតពិនិត្យលើស្ថានភាពវិវឌ្ឍនៃកម្មវិធីកំណែទម្រង់ វិមជ្ឈការ និងវិសហមជ្ឈការ តាមរយៈការអនុវត្តផែនការសកម្មភាព និងថវិកាឆ្នាំ២០១៩របស់ គ.ជ.អ.ប.ផង និងដើម្បីឆ្លងសេចក្តីព្រាងអនុក្រឹត្យចំនួន៤ ពាក់ព័ន្ធនឹងការកែសម្រួលរចនាសម្ព័ន្ធគ្រប់គ្រងរបស់រដ្ឋបាលក្រុង ស្រុក ខណ្ឌ និងការផ្ទេរមុខងារក្នុងវិស័យសុខាភិបាលទៅឱ្យរដ្ឋបាលរាជធានី ខេត្តផង។
សម្តេចក្រឡាហោមមានប្រសាសន៍ថា ក្នុងអាណត្តិទី៦នៃរដ្ឋសភានេះ ក្នុងក្របខណ្ឌនៃកំណែទម្រង់វិមជ្ឈការ និងវិសហមជ្ឈការ យើងផ្តោតជាសំខាន់ទៅលើកិច្ចការស្នូលជាអាទិភាពចំនួន៣ គឺ៖ ទី១. ការបង្កើនមូលនិធិឃុំ សង្កាត់, ទី២. ការផ្ទេរមុខងារ និងធនធានទៅឱ្យរដ្ឋបាលថ្នាក់ក្រោមជាតិ និង, ទី៣.ការកែសម្រួលរចនាសម្ព័ន្ធគ្រប់គ្រងរបស់រដ្ឋបាលថ្នាក់ក្រុង ស្រុក។ សម្តេចបន្តថា ពាក់ព័ន្ធនឹងការបង្កើនមូលនិធិឃុំ សង្កាត់ នាពេលថ្មីៗនេះ រាជរដ្ឋាភិបាលបានដាក់ចេញអនុក្រឹត្យ ចុះថ្ងៃទី២១ ខែសីហា ឆ្នាំ២០១៩ ស្តីពីការផ្ទេរធនធានបន្ថែមពីថវិការដ្ឋជូនរដ្ឋបាលឃុំ សង្កាត់សម្រាប់ចំណាយអភិវឌ្ឍន៍មូលដ្ឋានចាប់ពីឆ្នាំ២០២០តទៅ ក្នុងនោះ រដ្ឋបាលឃុំ សង្កាត់នីមួយៗនឹងទទួលបានថវិកាសរុបជាមធ្យមចំនួនប្រមាណ១២២.០០០ដុល្លារ ក្នុងនោះថវិកាផ្នែកអភិវឌ្ឍន៍មូលដ្ឋានមានចំនួនជាមធ្យមប្រមាណជាង៧០.០០០ដុល្លារក្នុងឆ្នាំ២០២០ (កើនឡើងទ្វេដងធៀបនឹងឆ្នាំ២០១៩) ហើយថវិកានេះនឹងកើនឡើងជាបន្តបន្ទាប់រៀងរាល់ឆ្នាំ ដែលរហូតដល់ឆ្នាំ២០២៣ រដ្ឋបាលឃុំ សង្កាត់នីមួយៗនឹងទទួលបានថវិកាសរុបជាមធ្យមចំនួនប្រមាណ១៩៣.០០០ដុល្លារ ដែលក្នុងនោះថវិកាផ្នែកអភិវឌ្ឍន៍មូលដ្ឋានមានចំនួនជាមធ្យមប្រមាណជាង១៣២.០០០ដុល្លារ។ សម្តេចបានបន្ថែមទៀតថា ទោះបីយ៉ាងនេះក្តី កិច្ចការដែលយើងត្រូវបន្តផ្តោតយកចិត្តទុកដាក់ពាក់ព័ន្ធនឹងការបង្កើនថវិកាឃុំ សង្កាត់នេះ គឺការពង្រឹងការគាំទ្រផ្នែកបច្ចេកទេស និងសមត្ថភាពដល់រដ្ឋបាលឃុំ សង្កាត់ ដើម្បីធានាឱ្យបានថា រដ្ឋបាលឃុំ សង្កាត់នីមួយៗអាចគ្រប់គ្រង ចាត់ចែង និងប្រើប្រាស់ថវិការបស់ខ្លួនស្របតាមគោលការណ៍ និងនីតិវិធីជាធរមានប្រកបដោយប្រសិទ្ធភាព គណនេយ្យភាព ឆ្លើយតបទៅនឹងតម្រូវការអភិវឌ្ឍន៍ជាក់ស្តែងនៅតាមមូលដ្ឋាននីមួយៗ និងដោយមានការចូលរួមតាមដានត្រួតពិនិត្យពីប្រជាពលរដ្ឋ ដោយផ្ទាល់ផងដែរ។
សម្តេចក្រឡាហោម បានលើកឡើងដែរថា ពាក់ព័ន្ធនឹងការផ្ទេរមុខងារទៅឱ្យរដ្ឋបាលថ្នាក់ក្រោមជាតិ បើទោះបីជា គ.ជ.អ.ប. តាមរយៈលេខាធិការដ្ឋាន គ.ជ.អ.ប. បានខិតខំសម្របសម្រួល និងផ្តល់ការគាំទ្រទាំងផ្នែកបច្ចេកទេស និងហិរញ្ញវត្ថុក្នុងរយៈពេលជាច្រើនឆ្នាំកន្លងមកនេះដល់ក្រសួង ស្ថាប័នពាក់ព័ន្ធនានា ដើម្បីជំរុញដល់ការផ្ទេរមុខងារសមស្របនានាទៅឱ្យរដ្ឋបាលថ្នាក់ក្រោមជាតិក៏ដោយ ក៏កិច្ចការនេះនៅតែមានភាពយឺតយ៉ាវ និងមិនទាន់បានសម្រេចនូវសមិទ្ធផលជាដុំកំភូនដូចការរំពឹងទុកឡើយ។ ប្រការនេះ បានធ្វើឱ្យរដ្ឋបាលថ្នាក់ក្រោមជាតិនៅតែពុំទាន់មានតួនាទី សិទ្ធិអំណាច និងការទទួលខុសត្រូវច្បាស់លាស់ក្នុងការផ្តល់សេវាចាំបាច់ជាមូលដ្ឋាននានាជូនប្រជាពលរដ្ឋក្នុងដែនសមត្ថកិច្ចរបស់ខ្លួនស្របតាមគោលការណ៍វិមជ្ឈការ និងវិសហមជ្ឈការរបស់រាជរដ្ឋាភិបាលឡើយ។
សម្តេចបានគូសបញ្ជាក់បន្ថែមដែរថា ដើម្បីការផ្ទេរមុខងារទៅឱ្យរដ្ឋបាលថ្នាក់ក្រោមជាតិកាន់តែទទួលបានប្រសិទ្ធភាព សេចក្តីព្រាងអនុក្រឹត្យចំនួន៤ពាក់ព័ន្ធនឹងការកែសម្រួលរចនាសម្ព័ន្ធរបស់រដ្ឋបាលថ្នាក់ក្រោមជាតិ និងការកំណត់អំពីមុខងារចាំបាច់មួយចំនួនដែលត្រូវប្រគល់ជាបឋមទៅឱ្យរដ្ឋបាលថ្នាក់ក្រោមជាតិទាំងនោះ នឹងត្រូវដាក់ឆ្លងក្នុងកិច្ចប្រជុំនាពេលនេះ ដែលក្នុងនោះរួមមាន៖ ១.សេចក្តីព្រាងអនុក្រឹត្យស្តីពីមុខងារ និងរចនាសម្ព័ន្ធរបស់រដ្ឋបាលក្រុង, ២.សេចក្តីព្រាងអនុក្រឹត្យស្តីពីមុខងារ និងរចនាសម្ព័ន្ធរបស់រដ្ឋបាលក្រុង, ៣.សេចក្តីព្រាងអនុក្រឹត្យស្តីពីមុខងារ និងរចនាសម្ព័ន្ធរបស់រដ្ឋបាលខណ្ឌ, ៤.សេចក្តីព្រាងអនុក្រឹត្យស្តីពីការផ្ទេរមុខងារក្នុងវិស័យសុខាភិបាលទៅឱ្យរដ្ឋបាលរាជធានី ខេត្ត៕រតនា
ដោយ៖ នាយកដ្ឋានព័ត៌មានវិទ្យា
