នាព្រឹកថ្ងៃអង្គារ ទី១៩ ខែវិច្ឆិកា ឆ្នាំ២០១៩ ក្រសួងមហាផ្ទៃ បានបើកកិច្ចប្រជុំពិភាក្សាលើសេចក្តីព្រាងកែសម្រួលអនុក្រឹត្យលេខ១០៩ អនក្រ.បក ចុះថ្ងៃទី១៩ ខែសីហា ឆ្នាំ២០១៥ ស្តីពីការរៀបចំ និងការប្រព្រឹត្តទៅរបស់ក្រសួងមហាផ្ទៃ នាទីស្តីការក្រសួង ក្រោមអធិបតីភាព ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ ដោយមានការចូលរួមពី រដ្ឋលេខាធិការ អនុរដ្ឋលេខាធិការ អគ្គនាយក នៃអគ្គនាយកដ្ឋាននានា មន្រ្តីជំនាញ និងអង្គភាពចំណុះពាក់ព័ន្ធជាច្រើន។
កិច្ចប្រជុំនេះ គឺធ្វើឡើងដើម្បីពិភាក្សាព្រាង និងកែសម្រួលលើអនុក្រឹត្យ១០៩ជាមួយអគ្គនាយកដ្ឋាន និងអង្គភាពសាមីពាក់ព័ន្ធក្រោមចំណុះនានា នៃក្រសួងមហាផ្ទៃ ដែលអនុក្រឹត្យនេះនិងត្រូវរៀបចំបើកកិច្ចប្រជុំសម្រេចចុងក្រោយ បន្ទាប់ពីបានពិភាក្សា និងកែសម្រួលយ៉ាងល្អិតល្អន់ ជាមួយអង្គភាពសាមីពាក់ព័ន្ធ។ អនុក្រឹត្យនេះ មានគោលបំណងកំណត់អំពីតួនាទី ភារកិច្ច រចនាសម្ព័ន្ធ និងមានគោលដៅកំណត់ដែលសមត្ថកិច្ចរបស់ក្រសួងមហាផ្ទៃ ហើយមានវិសាលភាពអនុវត្តចំពោះរដ្ឋបាលថ្នាក់ក្រោមជាតិ និងអង្គភាពនានាចំណុះក្រសួងមហាផ្ទៃ។ ជាងនេះទៀត អនុក្រឹត្យ១០៩នេះ បានបញ្ជាក់ពីបេសកកម្មដឹកនាំរបស់ក្រសួងមហាផ្ទៃ លើការគ្រប់គ្រងរដ្ឋបាលដែនដីគ្រប់ថ្នាក់ វិស័យនយោបាយរដ្ឋបាល គ្រប់គ្រងកងកម្លាំងនគរបាលជាតិលើវិស័យសន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គមក្នុងព្រះរាជាណាចក្រកម្ពុជា៕ រតនា
ដោយ៖ នាយកដ្ឋានព័ត៌មានវិទ្យា