នាព្រឹកថ្ងៃអង្គារ ទី១៩ ខែវិច្ឆិកា ឆ្នាំ២០១៩ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន អញ្ជើញជាធិបតីក្នុងពិធីបើកវេទិការជាតិអេកូទេសចរណ៍លើកទី១ អមជាមួយពិធីប្រកាសដាក់ឲ្យប្រើប្រាស់គោលនយោបាយជាតិអេកូទេសចរណ៍ (២០១៨-២០៣០) ដែលប្រព្រឹត្តទៅនៅសណ្ឋាគារហ្គាដិនស៊ីធី ដោយមានការចូលរួមពី ថ្នាក់ដឹកនាំរាជរដ្ឋាភិបាល ក្រសួងស្ថាប័នពាក់ព័ន្ធ តំណាងសហគមន៍ទេសចរណ៍ និងអេកូទេសចរណ៍ទូទាំងប្រទេស អង្គការជាតិ-អន្តរជាតិ និងដៃគូពាក់ព័ន្ធនានាជាច្រើនផងដែរ។
សូមជម្រាបថា ដោយកំណើនវិស័យទេសចរណ៍កម្ពុជាមានការកើនឡើង ហើយក៏ជាកត្តាដ៏មានសក្តានុពលយ៉ាងខ្លាំងក្នុងការចូលរួមជម្រុញការអភិវឌ្ឍជាតិ ឱ្យកាន់តែរីកចម្រើននោះ និងដើម្បីឆ្លើយតបចំពោះការគាំទ្រដល់ការអភិវឌ្ឍសហគមន៍ទេសចរណ៍ និងអេកូទេសចរណ៍ក្នុងប្រទេសកម្ពុជា រាជរដ្ឋាភិបាលបានបង្កើតក្រុមការងារអន្តរក្រសួង ដើម្បីគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ តាមរយៈសេចក្តីសម្រេចលេខ ១០០ សសរ ចុះថ្ងៃទី៣០ ខែតុលា ឆ្នាំ២០១៧ ព្រមជាមួយការអនុម័ត គោលនយោបាយជាតិ អេកូទេសចរណ៍ (២០១៩-២០៣០) នាឱកាសកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី១៩ ខែវិច្ឆិកា ឆ្នាំ២០១៨ ដែលត្រូវបានប្រកាសដាក់ឱ្យប្រើប្រាស់ជាផ្លូវការនាពេលនេះ។
ព្រមជាមួយគ្នានោះ សម្តេចក្រឡាហោម ក៏បានប្រគល់ពាន់រង្វាន់ ចំពោះជ័យលាភីសហគមន៍ ទេសចរណ៍គំរូទាំង ១៥ សម្រាប់ឆ្នាំ២០១៩នេះ ហើយសម្តេចបានអំពាវនាវឲ្យគ្រប់សហគមន៍ផ្សេងៗទៀត ចូលរួមចលនាប្រឡងប្រណាំងនេះនៅឆ្នាំក្រោយៗទៀតឲ្យ បានផុសផុល រួមចំណែកធ្វើឱ្យកម្ពុជាក្លាយជាគោលដៅទេសចរណ៍ប្រកប ដោយភាពទាក់ទាញ និងផ្តល់ភាពកក់ក្តៅដល់ភ្ញៀវទេសចរផងដែរ៕ រតនា
ដោយ៖ នាយកដ្ឋានព័ត៌មានវិទ្យា