នារសៀលថ្ងៃសុក្រ ទី១៥ ខែវិច្ឆិកា ឆ្នាំ២០១៩ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអនុញ្ញាតឱ្យលោកជំទាវ Helene Budliger Artieda ឯកអគ្គរដ្ឋទូតនៃប្រទេសស្វីស ទទួលបន្ទុកព្រះរាជាណាចក្រកម្ពុជា ព្រមទាំងសហការី ចូលជួបសម្តែងការគួរសម នៅទីស្តីការក្រសួងមហាផ្ទៃ។
សម្ដេចក្រឡាហោម បានថ្លែងអំណរគុណដល់លោកជំទាវឯកអគ្គរដ្ឋទូតស្វីសដែលទើបតែងតាំងថ្មីប្រចាំព្រះរាជាណាចក្រកម្ពុជា សម្ដេចពិតជារីករាយចំពោះទំនាក់ទំនង និងកិច្ចសហប្រតិបត្តិការដ៏ល្អដែលប្រទេសទាំងពីរមានជាមួយគ្នាកន្លងមក ហើយក៏បានបង្កើតនូវលទ្ធផលជាច្រើនផងដែរនៅក្នុងទំនាក់ទំនងនៃកិច្ចសហប្រតិបត្តិការនេះ។ សម្ដេចក៏សង្ឃឹមថាទំនាក់ទំនងនៃកិច្ចសហប្រតិបត្តិការរវាងកម្ពុជា និងស្វីសនឹងបន្តរីកចម្រើនបន្ថែមទៀតនៅក្នុងអាណត្តិបេសកកម្មកាទូតរបស់លោកជំទាវនៅក្នុងអាណត្តិថ្មីនេះ។ សម្តេចបានបន្តថា ក្នុងនាមរាជរដ្ឋាភិបាល និងក្នុងនាមសម្ដេចផ្ទាល់ សូមថ្លែងអំណរគុណដល់រដ្ឋាភិបាលស្វីសដែលបានជួយគាំទ្រជាបន្តបន្ទាប់រួមទាំងការគាំទ្រមកលើផ្នែកកំណែទម្រង់វិមជ្ឈការ និងវិសហមជ្ឈការ ដែលសម្ដេចផ្ទាល់ជាអ្នកដឹកនាំការងារនេះនៅក្នុងរាជរដ្ឋាភិបាលកម្ពុជា ព្រមជាមួយគ្នានោះសម្ដេចក៏បានរំលឹកឡើងវិញនូវអនុស្សាវរីយ៍កាលពីឆ្នាំ២០១៦កន្លងទៅ ដែលសម្ដេចបានអញ្ជើញទស្សនកិច្ចនៅប្រទេសស្វីស ដើម្បីសិក្សាស្វែងយល់អំពីកំណែទម្រង់វិមជ្ឈការ និងវិសហមជ្ឈការនៅទីនោះដែលបានផ្ដល់នូវគំនិតល្អៗ និងធាតុចូលល្អៗមកលើការងារកំណែទម្រង់របស់កម្ពុជា។ សម្ដេចក្រឡាហោមបានបន្ថែមថា សម្តេចក៏ត្រៀមខ្លួនជានិច្ចក្នុងនាមជាស្ថាប័នអនុវត្តច្បាប់ ក៏ដូចជាស្ថាប័នដែលដឹកនាំការងារកំណែទម្រង់នេះនឹងបន្តកិច្ចសហប្រតិបត្តិការជាមួយលោកជំទាវឯកអគ្គរដ្ឋទូត។
ជាការឆ្លើយតបលោកជំទាវឯកអគ្គរដ្ឋទូត ក៏បានឯកភាពចំពោះទំនាក់ទំនងដ៏យូរលង់មកហើយរវាងប្រទេសទាំងពីរ ហើយលោកជំទាវក៏បានបញ្ជាក់ថាស្វីសនៅតែមានបំណងក្នុងការធ្វើឱ្យទំនាក់ទំនងនេះកាន់តែខ្លាំងក្លាឡើងថែមទៀត និងកាន់តែយូរអង្វែងថែមទៀតផងដែរ។ លោកជំទាវក៏បានយកឱកាសនេះជម្រាបជូនសម្ដេចដែលថា បច្ចុប្បន្ននេះស្វីសក៏ចូលទៅក្នុងប្រទេសនៃទំនាក់ទំនង ASEM ហើយក៏ក្លាយទៅជាដៃគូរសន្ទនាមួយរបស់អាស៊ានផងដែរា ហើយក្នុងន័យនេះលោកជំទាវក៏បានជម្រាបជូនសម្ដេចថា ប្រទេសស្វីសក៏កំពុងខិតខំលើកកម្ពស់ទំនាក់ទំនងប្រទេសនៅក្នុងតំបន់អ៊ឺរ៉ុបផង ក្រៅតំបន់ផង និងជាមួយកម្ពុជាផង ព្រមទាំងបណ្តាប្រទេសជិតខាងកម្ពុជាដែលស្ថិតក្នុងតំបន់ទន្លេមេគង្គផងដែរ។ លោកជំទាវបានបញ្ជាក់ដែរថា ក្នុងន័យនេះទំនាក់ទំនងមិនថាទ្វេភាគី ឬពហុទ្វេភាគីគឺពិតជាមានសារៈសំខាន់ក្នុងការលើកកម្ពស់ទំនាក់ទំនងទាំងជាមួយកម្ពុជាផងនិងបណ្តាប្រទេសក្នុងតំបន់នៅក្នុងអាស៊ានផង។
ជាការឆ្លើយតបសម្ដេចក្រឡាហោម ពិតជាអរគុណចំពោះឆន្ទៈដ៏ល្អរបស់លោកជំទាវ និងរដ្ឋាភិបាលស្វីសក្នុងការបន្តជួយគាំទ្រ និងបន្តពង្រីកនូវទំនាក់ទំនងជាមួយប្រទេសកម្ពុជា ដោយសម្ដេចបានលើកឡើងថាជា ពិតណាស់ការអភិវឌ្ឍដែលកម្ពុជាទទួលបានមកដល់បច្ចុប្បន្ននេះគឺមិនអាចកាត់ផ្ដាច់បានពីការចូលរួមចំណែកពីរដ្ឋាភិបាលស្វីសឡើយ។ សម្តេចក្រឡាហោមបានបញ្ជាក់ដែរថា ពាក់ព័ន្ធនឹងការងារកំណែទម្រង់វិមជ្ឈការ និងវិសហមជ្ឈការនេះ បច្ចុប្បន្នកម្ពុជានៅមានភារកិច្ចបន្តត្រូវតែធ្វើបន្ថែមទៀត និងត្រូវបន្តស្វែងរកនូវកិច្ចសហប្រតិបត្តិការក៏ដូចជាពង្រីកកិច្ចសហប្រតិបត្តិការជាមួយដៃគូពាក់ព័ន្ធបន្ថែមទៀត ដើម្បីបន្តដំណើរការការងារកំណែទម្រង់វិមជ្ឈការ និងវិសហមជ្ឈការរបស់ខ្លួន។
ជាមួយគ្នានោះលោកជំទាវឯកអគ្គរដ្ឋទូតបានគូសបញ្ជាក់ដែរថា ពាក់ព័ន្ធទៅនឹងកំណែទម្រង់ការងារវិមជ្ឈការ និងវិសហមជ្ឈការនេះគឺប្រទេសស្វីសមានប្រវត្តិយូរឆ្នាំណាស់មកហើយក្នុងការអនុវត្តនូវគោលនយោបាយនេះ ហើយលោកជំទាវជឿជាក់ថាការធ្វើកំណែទម្រង់វិមជ្ឈការ និងវិសហមជ្ឈការនេះគឺមានការផ្ដល់នូវអត្ថប្រយោជន៍យ៉ាងច្រើនដល់ប្រជាពលរដ្ឋ ជាពិសេសក្នុងការទទួលបាននូវសេវាសាធារណៈ ហើយនិងការផ្សារភ្ជាប់នូវទំនាក់ទំនងគ្នាកាន់តែជិតស្និទ្ធរវាងរដ្ឋបាល និងប្រជាពលរដ្ឋដែលជាអ្នកទទួលសេវាក៏ដូចជាការស្វែងយល់អំពីគម្រោងអាទិភាពនានាដែលរដ្ឋបាលថ្នាក់ក្រោមជាតិនីមួយៗត្រូវការសម្រាប់មូលដ្ឋានរបស់ខ្លួន។
ជាការឆ្លើយតប សម្ដេចក្រឡាហោម បានជម្រាបដល់លោកជំទាវឯកអគ្គរដ្ឋទូតថា នៅឆ្នាំ ២០២០ខាងមុខនេះ គឺជាឆ្នាំទី១០ ហើយដែលកម្ពុជាបានដំណើរការលើការងារធ្វើកំណែទម្រង់វិមជ្ឈការ និងវិសហមជ្ឈការនេះ និងបានបង្កើតឡើងនូវលទ្ធផល សមិទ្ធផលជាច្រើននៅក្នុងការងារនេះផងដែរ។ សម្តេចបន្តទៀតថា ការងារបន្ទាប់នោះគឺរាជរដ្ឋាភិបាលកម្ពុជាត្រូវបន្តពិនិត្យនឹងបន្តត្រូវការបន្ថែមទៀតនូវជំនួយបច្ចេកទេស និងការរៀបចំផែនការយុទ្ធសាស្ត្ររយៈពេល៥ ឆ្នាំ ឬ ១០ឆ្នាំរបស់ខ្លួនជាបន្តទៀតសម្រាប់ជាជំហានបន្ទាប់នៅក្នុងកំណែទម្រង់វិមជ្ឈការ និងវិសហមជ្ឈការនេះ។
លោកជំទាវឯកអគ្គរដ្ឋទូតបានមានប្រសាសន៍ដែរថា លោកជំទាវរីករាយក្នុងការជួយគាំទ្រដល់តម្រូវការបច្ចេកទេសតាមការលើកឡើងរបស់សម្ដេចក្រឡាហោម ដូចជាចូលរួមគាំទ្រដល់ដំណើរការកំណែទម្រង់វិមជ្ឈការ និងវិសហមជ្ឈការនេះ។ លោកជំទាវលើកឡើងដែរថា ជាការពិតណាស់ការធ្វើវិមជ្ឈការ និងវិសហមជ្ឈការនេះគឺត្រូវទាមទារឲ្យរដ្ឋបាលថ្នាក់ក្រោមជាតិត្រូវតែមានសមត្ថភាពរឹងមាំ ដើម្បីទទួលយកភារកិច្ចបម្រើប្រជាពលរដ្ឋនៅក្នុងមូលដ្ឋានរបស់ខ្លួន។ នៅក្នុងដំណើរការវិមជ្ឈការ និងវិសហមជ្ឈការនេះក៏ត្រូវការចាំបាច់ដែរ នូវការចូលរួមរបស់សង្គមស៊ីវិល ក្នុងការរួមចំណែកកសាង និងអភិវឌ្ឍន៍សហគមន៍របស់ខ្លួន ប៉ុន្តែការចូលរួមនោះក៏ត្រូវតែមានភាពស្មោះត្រង់ និងការជឿជាក់ដោយតម្លាភាពជាមួយគ្នាទៅវិញទៅមកផងដែរ។
សម្ដេចក្រឡាហោមក៏បានឯកភាពចំពោះការលើកឡើងរបស់លោកជំទាវ ជាក់ស្តែងបច្ចុប្បន្នរាជរដ្ឋាភិបាលកម្ពុជាបាននឹងកំពុងយកចិត្តទុកដាក់ក្នុងការបង្កើន និងជំរុញនូវភាពជាដៃគូរវាងអង្គការសង្គមស៊ីវិលជាមួយនិងរាជរដ្ឋាភិបាលក្នុងការអនុវត្តនូវយន្តការជាបន្តបន្ទាប់ជាមួយគ្នាសម្រាប់ការងារលើកកម្ពស់ភាពជាដៃគូជាមួយគ្នាផងដែរ។
ជាទីបញ្ចប់លោកជំទាវបានជម្រាបជូនអំពីបំណងរបស់រដ្ឋាភិបាលស្វីស ប្រសិនបើរដ្ឋាភិបាលកម្ពុជាមានតម្រូវការអ្វីដែលប្រទេសស្វីសអាចជួយគាំទ្របានគឺរដ្ឋាភិបាលស្វីសរីករាយនឹងជួយគាំទ្រដល់រដ្ឋាភិបាលកម្ពុជា ហើយជាការឆ្លើយតបនោះគឺសម្ដេចក្រឡាហោមបានជម្រាបជូនថាមានចំណុចពីរសំខាន់គឺ ទីមួយស្នើឲ្យភាគីស្វីសពិចារណាធ្វើការគាំទ្រពាក់ព័ន្ធទៅនឹងការផ្តល់នូវគំនិតយោបល់ផ្សេងៗទៅលើសំណើក៏ដូចជាការកែលម្អឲ្យកាន់តែប្រសើរថែមទៀតនូវច្បាប់ស្ដីពីអង្គការសង្គមស៊ីវិលហើយ និងទីពីរពាក់ព័ន្ធទៅនឹងការជួយផ្នែកបច្ចេកទេសក្នុងការព្រាងនូវផែនការជំហានបន្ទាប់នៅក្នុងកំណែទម្រង់វិមជ្ឈការនិងវិសហមជ្ឈការរបស់កម្ពុជា៕ រតនា
ដោយ៖ នាយកដ្ឋានព័ត៌មានវិទ្យា