នៅទីស្តីការក្រសួងមហាផ្ទៃ នារសៀលថ្ងៃពុធ ទី២៨ ខែសីហា ឆ្នាំ២០១៩នេះ គណៈកម្មាធិការប្រយុទ្ធប្រឆាំងផលិតផលក្លែងក្លាយ ក្រសួងមហាផ្ទៃ បានរៀបចំកម្មវិធីបិទវគ្គបណ្តុះបណ្តាលស្តីពី ក្រមនីតិវិធីព្រហ្មទណ្ឌ និងតួនាទី ភារកិច្ច មន្រ្តីនគរបាលយុត្តិធម៌ ក្រោមអធិបតីភាព ឯកឧត្តម នាយឧត្តមសេនីយ៍ មៀច សុផាន់ណា រដ្ឋលេខាធិការ ក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) ដោយមានការចូលរួមពី ថ្នាក់ដឹកនាំក្រសួង គ្រូឧទ្ទេសនាម សិក្ខាកាម និងមន្ត្រីពាក់ព័ន្ធជាច្រើនរូប។
ក្នុងឱកាសនេះ ឯកឧត្តម មៀច សុផាន់ណា បានមានប្រសាសន៍កោតសរសើរចំពោះការខិតខំប្រឹងប្រែងរបស់គ្រូឧទ្ទេស និងសិក្ខាកាមទាំងអស់ដែលបានយកចិត្តទុកដាក់បណ្តុះបណ្តាល និងសិក្សារហូតដល់ចប់កម្មវិធីដោយជោគជ័យ។ឯកឧត្តមក៏បានផ្តាំផ្ញើ និងណែនាំដល់មន្រ្តីសិក្ខាកាមទាំងអស់ឲ្យយកចំណេះដឹងដែលបានពីការរៀនសូត្រនេះយកទៅអនុវត្តការងារប្រកបដោយប្រសិទ្ធភាពខ្ពស់ និងសម្រេចបានជោគជ័យ។
សូមបញ្ជាក់ថា វគ្គបណ្តុះបណ្តាលនេះមានរយៈពេលពីរថ្ងៃ គីនៅថ្ងៃទី២៣ និងថ្ងៃទី២៨ ខែសីហា ឆ្នាំ២០១៩ ក្នុងគោលបំណងដើម្បីផ្ដល់ចំណេះដឹងបន្ថែមដល់មន្រ្តីអនុវត្តច្បាប់នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក)អំពីនីតិវិធីអនុវត្តច្បាប់ផ្សេងៗ ដែលមានចែងក្នុងក្រមនីតិ វីធីព្រហ្មទណ្ឌ និងតួនាទី ភារកិច្ច មន្រ្តីនគរបាលយុត្តិធម៌ ក្នុងគោលបំណង ដើម្បីពង្រឹងមន្រ្តីអនុវត្តច្បាប់ឲ្យកាន់តែមានសមត្ថភាព ពេលចុះបង្រ្កាបផលិតផលក្លែងក្លាយ និងហានិភ័យរបស់សមត្ថកិច្ចជំនាញ ពេលដែលចុះបង្រ្កាបទីតាំងផលិតផលក្លែងក្លាយ៕ រតនា
ដោយ៖ នាយកដ្ឋានព័ត៌មានវិទ្យា