នៅព្រឹកថ្ងៃទី៣០ ខែកក្កដា ឆ្នាំ២០១៩ ឯកឧត្តម សន្តិបណ្ឌិត ចាន់ អ៊ាន រដ្ឋលេខាធិការ ក្រសួងមហាផ្ទៃ បានថ្លៃងក្នុងពិធីចុះសួរសុខទុក្ខ សិស្សនាយនគរបាល និងនាយនគរបាលរង “វគ្គបណ្តុះបណ្តាលកម្រិតបឋមវិជ្ជាជីវៈ នគរបាល“ ជំនាន់ទី១៣ លើកទី៣ នៅខេត្តកំពង់ស្ពឺថា ការបណ្តុះបណ្ដាលមន្រ្តីនគរបាលជាតិ នៅសាលាបណ្ឌិតសភានគរបាលជាតិកម្ពុជា គឺផ្ដោតលើគុណភាពជាចំបង ពោលគឺត្រូវរៀនឱ្យចេះ មិនមែនរៀនឱ្យចប់ ដើម្បីបង្រ្គប់កិច្ចនោះទេ ហើយក៏គ្មានការសម្របសម្រួល និងមិនស្ថិតនៅក្រោមឥទ្ធិពលនៃអន្តរាគមន៍ណា មួយនោះឡើយ ហេតុនេះ សូមក្មួយៗយកចិត្តទុកដាក់សិក្សា រៀន សូត្រ និងគោរពវិន័យឱ្យបានល្អ ម្យ៉ាងវិញទៀត ការបណ្តុះបណ្តាលដែលប្រកបដោយគុណភាព លុះត្រាតែមានការចូលរួមចំណែកពីគ្រប់ភាគីពាក់ព័ន្ធទាំងអស់ គឺបណ្ឌិត្យសភា អ្នកសិក្សា និងអង្គភាពពាក់ព័ន្ធ ដែលត្រូវរួមគ្នាអនុវត្តជាប្រចាំ ជាអចិន្រ្តៃយ៍ ទើបអាចរក្សាបាននូវនិរន្តរភាពនៃគុណភាព។
ឯកឧត្តម សន្តិបណ្ឌិត ក៏បានសម្តែងនូវការកោតសរសើរ និងថ្លែងអំណរគុណ ដល់លោកនាយកសាលានគរបាលជាតិភូមិភាគ ៣ និងមន្រ្តីក្រោមឱវាទ ក្នុងការប្រឹងប្រែងអស់ពីកម្លាំងកាយ ចិត្ត ប្រាជ្ញា ស្មារតី ក្នុងគ្រប់គ្រង និងចាត់ចែងដំណើរការវគ្គបណ្តុះបណ្តាលនេះ ឯកឧត្តម ក៏បានណែនាំដល់សិស្សនគរបាលគ្រប់រូប ត្រូវយកចិត្តទុកដាក់សិក្សារៀនសូត្រ ទាំងក្នុងថ្នាក់ និងក្រៅថ្នាក់ ដោយធ្វើស្វ័យសិក្សាទាំងទ្រឹស្តី និងការអនុវត្តជាក់ស្តែង នឹងត្រូវមានវត្តមានគ្រប់ពេលសិក្សា និងពេលប្រជុំជួរនិងគោរពវិន័យឱ្យបានខ្ជាប់ខ្ជួន ទាំងវិន័យ ពេលសិក្សា វិន័យពេលប្រឡង និងវិន័យពេលស្នាក់នៅ ការស្លៀកពាក់ កាត់សក់ ការគោរព គំនាប់ ការបើកបរយានយន្ត ជាដើម និងហាមដាច់ខាតចំពោះការប្រព្រឹត្តនូវសកម្មភាពខុសច្បាប់នានាទាំងក្នុង និងក្រៅបរិវេណសាលា ជាពិសេស ត្រូវគោរពឱ្យបានដាច់ខាតនូវរាល់បទបញ្ញត្តិនានាដែលមានចែងក្នុង បទបញ្ជាផ្ទៃក្នុង។
ឆ្លៀតក្នុងឱកាសនោះ ឯកឧត្តម សន្តិបណ្ឌិត ក៏បាននាំមកជាមួយនូវអំណោយ របស់សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ រួមមានមី ៥០កេស, ទឹកត្រី ៥ យួរ ទឹកស៊ីអីវ ៥ យួរ និងថវិកា ១,០៨០,០០០ រៀល ដើម្បីឧបត្ថម្ភដល់សាលាមន្ត្រីសាលា និងសិស្សនគរបាលផងដែរ៕
ប្រភព៖ ក្រសួងមហាផ្ទៃ