នៅព្រឹកថ្ងៃចន្ទ ទី២៩ ខែកក្កដា ឆ្នាំ២០១៩ នាទីស្តីការក្រសួង ឯកឧត្តម សន្តិបណ្ឌិត សុខ ផល រដ្ឋលេខាធិការ ក្រសួងមហាផ្ទៃ បានដឹកនាំកិច្ចប្រជុំពិភាក្សាលើការចេញចូលច្រកទា្វរព្រំដែន និងការប្រើប្រាស់បណ្ណព្រំដែន ដោយមានការចូលរួមពី អនុរដ្ឋលេខាធិការ អគ្គនាយករដ្ឋបាល អគ្គស្នងការរងនគរបាលជាតិទទួលបន្ទុកការពារព្រំដែន និងអគ្គនាយករង នៃអគ្គនាយកដ្ឋានអន្តោប្រវេសន៍។
សូមជំរាបដែរថា កិច្ចប្រជុំនេះមានគោលដៅស្ដាប់របាយការណ៍ជំនាញ និងរបាយការណ៍ស្ដីពីការ ថ្នាំងថ្នាក់ចិត្តរបស់ប្រជាពលរដ្ឋនៅតាមតំបន់ព្រំដែនមួយចំនួន ជាពិសេសតំបន់ព្រំដែនរវាងព្រះរាជាណាចក្រកម្ពុជា និងព្រះរាជាណាចក្រថៃ ដែលជួបការលំបាកក្នុងការចេញចូល ឆ្លងកាត់ព្រំដែនឲ្យបានសមស្របក្រោយពីមានការបិទច្រករបៀងជាច្រកមិនផ្លូវការមួយចំនួនរួចមក។
គួរបញ្ជាក់បន្ថែមថា ការងារសំខាន់ចំពោះមុខដែលតម្រូវឲ្យមានការដោះស្រាយក្រោយកិច្ចប្រជុំនេះមានចំនួន០៣ រួមមាន៖
១- ពង្រីកទីតាំងផ្តល់បណ្ណព្រំដែនដល់ប្រជាពលរដ្ឋឲ្យបានច្រើនកន្លែងបន្ថែមទៀត
២- បង្កើតច្រកសំខាន់ៗមួយចំនួនឲ្យទៅជាច្រកតំបន់ (ជាផ្លូវការ) ដើម្បីស្នើសុំបញ្ចូលបន្ថែមទៅក្នុងកិច្ចព្រមព្រៀងស្ដីពីការឆ្លងកាត់ព្រំដែនរវាងកម្ពុជា និងថៃឆ្នាំ២០១៥
៣- រក្សាការចេញ ចូលតាមទម្លាប់បច្ចុប្បន្នឱ្យស្ថិតក្នុងស្ថានភាពដូចប្រក្រតីមួយរយៈដដែល ដោយការដោះស្រាយតាមផ្លូវច្បាប់ជាមួយប្រទេសជិតខាងអាចចំណាយរយៈពេលយូរ៕ គឹមអាន
ដោយ៖ នាយកដ្ឋានព័ត៌មានវិទ្យា