លោកជំទាវ ម៉ារៀ សាហ្គ្រេន (Maria Sargren) ឯកអគ្គរាជទូតស៊ុយអ៊ែតប្រចាំនៅព្រះរាជាណាចក្រកម្ពុជាចប់អាណត្តិ បានលើកសសើរដល់រាជរដ្ឋាភិបាលកម្ពុជា ដែលមានក្រសួងមហាផ្ទៃជាសេនាធិការ គឺកំពុងតែវិវឌ្ឍន៍កាន់តែល្អប្រសើរ ដែលក្នុងនោះរួមមានកិច្ចសហការការងារជាមួយអង្គការសង្គមស៊ីវិល និងការងារប្រយុទ្ធប្រឆាំងការជួញដូរមនុស្ស ដែលនេះគឺបង្ហាញឲ្យឃើញថាកម្ពុជា កំពុងដើរលើផ្លូវត្រូវក្រោមការដឹកនាំរបស់ប្រមុខរាជរដ្ឋាភិបាលកម្ពុជា។ នេះបើតាមប្រសាសន៍របស់ឯកឧត្តម ផាត សុផានិត អ្នកនាំពាក្យរងក្រសួងមហាផ្ទៃ ក្រោយជំនួបរវាងសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ជាមួយលោកជំទាវ ម៉ារៀ សាហ្គ្រេន (Maria Sargren) ឯកអគ្គរាជទូតស៊ុយអ៊ែតប្រចាំនៅព្រះរាជាណាចក្រកម្ពុជាដែលចប់អាណត្តិ នៅថ្ងៃពុធ ទី២៤ ខែកក្កដា ឆ្នាំ២០១៩ នាទីស្តីការក្រសួងមហាផ្ទៃ។ ឯកឧត្តម ផាត សុផានិត បានឲ្យដឹងបន្ថែមទៀតថា លោកជំទាវឯកអគ្គរាជទូត បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រសួងមហាផ្ទៃ ដែលបានបង្កភាពងាយស្រួល និងបង្កើតឲ្យមានវេទិកាភាពជាដៃគូរវាងរដ្ឋាភិបាល និងអង្គការសង្គមស៊ីវិល ទាំងថ្នាក់ជាតិ និងថ្នាក់ក្រោមជាតិ ហើយអង្គការសង្គមស៊ីវិលនេះពិតជាមានតួនាទីមួយសម្រាប់ចូលរួមចំណែកក្នុងការអភិវឌ្ឍសង្គមជាតិផងដែរ។ ឯកឧត្តមបានបន្តថា ចំពោះការងារប្រយុទ្ធប្រឆាំងអំពើជួញដូរមនុស្ស លោកជំទាវឯកអគ្គរាជទូតបានវាយតម្លៃខ្ពស់ចំពោះកិច្ចខំប្រឹងប្រែងរបស់សម្ដេចក្រឡាហោម ស ខេង ដែលជាប្រធានគណៈកម្មាធិការជាតិប្រឆាំងអំពើជួញដូរមនុស្សបានដឹកនាំអនុវត្តការងារបានល្អប្រសើរ និងទទួលបានលទ្ធផលជាច្រើនផងដែរ៕ គឹមអាន
ដោយ៖ នាយកដ្ឋានព័ត៌មានវិទ្យា
